Diasabra 6 di januari mainta Prome Minister Sra. Evelyn Wever-Croes a expresa e preocupacion grandi di Gobierno di Aruba pa cu e medida di Presidente Maduro pa cera frontera pa trafico di y pa entre Aruba y Curacao pa 72 ora.
Prome Minister Wever-Croes a duna di conoce cu desde diabierna anochi Gobierno di Aruba ta den evaluacion constante cu Buitenlandse Zaken di Hulanda como tambe cu su homologo premier di Curacao sr. Ruggenaath pa asina ta riba un linea. Riba e situacion aki, Prome Minister ta informa e pueblo di Aruba bisando:
“Atravez di e canalnan oficial di Reino nos ta den contacto cu autoridadnan di Venezuela pa mira con por soluciona e situacion.
Gobierno di Aruba ta dirigiendo tur atencion caba na atende cu e problema di contrabando, cu ta e motibo di e decision di presidente Maduro.
Reino y Aruba ta reconoce e preocupacionnan di Venezuela riba contrabando. Pa cua motibo tambe nos kier tene un linea habri di comunicacion. Y mi kier ta bastante enfatico riba esaki, si tin iligalidadnan cu ta tumanando luga, nan mester wordo combati. Y e intencion di Reino y Aruba ta pa haci esaki den cooperacion cu Venezuela.
Na e momento aki nos gobierno nobo ta haciendo tur lo posibel pa combati e contrabando cu tin. Manera Minister di Husticia a anuncia, entre otro lo intensifica control na nos costanan y cu e helicopter lo wordo treci bek, pa haci Aruba mas sigur y pa combati actonan ilegal na nos costanan.
Gobierno di Aruba a institui un comision especial pa atende cu e tema di contrabando. Ya nan a cuminsa traha riba esaki y lo intensifica e trabounan den curso di awe pa asina nos por purba uza e resultado di esaki pa nos yega na un solucion pa e situacion aki.
Entre Venezuela y Aruba tin lasonan hopi estrecho economicamente, familiar y cultural y pa e motibonan aki e medida aki pa sera e frontera cu Venezuela ta afecta nos hopi.
Na e momentonan aki tin Arubianonan na aeropuertonan na Venezuela cu no por bin Aruba pasobra e vuelonan directo pa Aruba y Curacao a wordo cancela. Vuelonan pa otro destinacion si ta sigui normal. Nos ta den evaluacion pa mira kico por haci.
E medida di Presidente Maduro ta pa cera e frontera di buelonan pa Aruba y Corsow pa 72 ora. Gobierno di Aruba y Reino lo sigui den dialogo cu Venezuela pa yega na un solucion di e situacion aki mas pronto posibel”.