Mahuma – Diasabra atardi algo prome cu 3:30 alarma grandi a wordo bati pa un accidente pabou di rotonde di Mahuma caminda un auto a bolter. A sigui bisa tambe cu lo tin hende pega den e vehiculo.
Na yegada di unidadnan di rescate ya e personanan tawata pafo di e auto cu a keda ariba su banda.
Na e sitio nos a compronde cu e auto ariba su banda, cu ta un Hyundai Tucson tawata bayendo direccion pariba y dado momento lo a hala bay ariba e banda robes pa pasa y aki ta caminda e Chevrolet Corsa lo dal e di un manera cu ela perde control completo ariba e vehiculo.
Poniendo e pasa over di e separacion di tera y cadushi, pa bay termina te na e otro banda di e caminda.
Na yegada di materiaalwagen no mester a bay den accion, paso ya ambos ocupante di e Tucson tawata pafo di e auto.
Dos ambulance a yega na e sitio, pa trata e cabayero di edad na stuur di e Corsa y un persona herida den e Tucson. Ambos a bay hospitaal.
Suerte
Nos ta papia aki di suerte, no ta di awor nos ta papia di e peliger aki y awe diasabra ela bira realidad.
Imagina si net e momento ey, tawata bin trafico contrario !
Lo tawata un tragedia, paso abo bayendo abou no ta pensa cu bo mester pone atencion ariba e trafico cu ta bayendo ariba e otro banda di caminda y diripiente haya cu auto ta bula di otro banda dal bo. Como automobista bo mester concentra bo dilanti y wak bo spiel y no loke ta pasando ariba e otro banda di e caminda,pero parce cu awor esey tambe como chauffeur lo bo tin di bay tene cuenta cune ariba Green Corridor.
Loke a pasa diasabra atardi, ta un wake up call !
“Mester bin beton pa separa e caminda aki di Green Corridor, prome cu algo hopi lamentabel sosode. Un cero di tera chikito,cadushi y aloe no ta stop e auto di bay otro banda.
Esnan responsabel pone man na obra y cuminsa sinta na mesa, pa haci esaki mas lihe cu ta posibel”.