Home Local Departamento di Emergencia a trata 336 pashent fin di aña y aña...

Departamento di Emergencia a trata 336 pashent fin di aña y aña nobo

SHARE

Departamento di Emergencia tabata bastante ocupa durante e ultimo dianan atendiendo un total di 336 pashent. Cuminsando desde 29 di december 2017 pa 6or di atardi te cu dia 2 di januari 2018 pa 6or di mainta, Departamento di Emergencia a atende 336 pashent di cual 45 a wordo admiti den Hospital. Di e 45 pashent cu a wordo admiti, 18 tabata hende muhe y 27 hende homber. E averahe di ‘wachttijd’ tabata 38 minuut.

E edad di pashent cu a acudi na Departamento di Emergencia a varia entre baby pa 103 aña. A atende 7 pashent entre edad di 9 aña pa 82 aña cu herido causa pa vuurwerk. Di e 7 victima di vuurwerk afortunadamente niun tabata di un gravedad halto pa ser admiti den Hospital.
Tabatin 192 pashent, esta 64% di e 336 pashent cu a drenta departamento di Emergencia cu kehonan un dokter di cas por a atende cu ne. E tres motibonan mas grandi pa acudi na nos departamento di Emergencia tabata kehonan di dolor di stoma, dolor di pecho y kehonan cardial, esta di curason. Ademas di esaki tabatin algun pashent relata na incidentenan manera accident di vehiculo, maltrato, intoxicacion di alcohol y tabatin pashent cu herida door di obheto skerpi.

Dokter di Warda dilanti di Hospital, esta Huisartsenpost, a mira un total di 188 pashent entre 30 di december 2017 pa dia 1 di januari 2018. Dia 30 di december a mira un total di 68 pashent, dia 31 di december 63 pashent y e prome dia di aña 2018 a mira un total di 57 pashent.

Hospital ta informa cu por bishita bo ser keri durante e orario nobo di bishita regular cual ta di 11.30am pa 1pm y di 3pm pa 8pm. Esaki ta cu excepcion di e departamento di ICU/CCU, PAAZ, departamento di Maternidad y departamento di Mucha y Stroke Unit.

Hunta di Directiva, staf y personal di Hospital ta desea Aruba henter un prospero aña 2018 yena cu hopi salud y amor.