Home » Prome Minister Evelyn Wever-Croes: Refleccion pa aña 2017 PUEBLO A PIDI UN COALICION CU E META COMUN PA PONE E SER HUMANO CENTRAL

Prome Minister Evelyn Wever-Croes: Refleccion pa aña 2017 PUEBLO A PIDI UN COALICION CU E META COMUN PA PONE E SER HUMANO CENTRAL

by Admin
0 comment 80 views

Vision di Gabinete Wever-Croes ta pa trece progreso y prosperidad pa Aruba

Prome Minister sra. Evelyn Wever-Croes durante e ultimo conferencia di prensa di Gobierno pa e aña aki, a duna un refleccion cortico riba e aña 2017. E mandatario principal di nos pais a considera aña 2017 como un aña di hopi cambio. Cuminsando cu un campaña electoral hopi diferente na unda e enfasis a wordo poni riba e programa di partido pa gobernacion y riba e ser humano cu mester ta central atrobe. Un campaña cu a desenboca den e resultado na unda pueblo a pidi un coalicion indicando e deseo profundo den un cambio pa miho. Un cambio di progreso y prosperidad. A sigui un temporada di formacion hopi interesante y largo. Pero pa prome biaha den 20 aña na Aruba, mester a negocia prome cu por a forma un gobierno.

META COMUN DI COALICION:
Prome Minister a enfatisa cu e caracteristica principal di e formacion di coalicion aki ta cu tin 3 partido totalmente diferente, cu pensamenteo y personanan totalmente diferente na otro pero cu a sa di yega na otro pa asina yega na un programa di gobernacion. E compromiso comun durante e formacion tabata pa pone e ser humano central locual a haci e procedura hopi mas senciyo y facil pa yega na compromisonan.

E mandatario e expresa cu ohala cu e mesun union y cooperacion durante e formacion, por refleha den nos comunidad, bisando cu ta den union e pueblo aki a logra cosnan grandi. E retonan cu nos pais ta enfrenta awo ta hopi grandi y ta den union so nos por enfrenta esakinan.

SITUACION FINANCIERO REAL:
Ora cu a asumi e responsabilidad den gobernacion un poco mas di un luna pasa, Gobierno a wordo confronta cu e situacion financiero real cu nos a considera un crisis financiero. Unabes cu e cifranan realistico y e magnitud di e problema financiero a keda conoci, nos tabata sa e momento ey cu e enfasis mester ta e tema financiero. Danki na e trabou grandi di Gobierno y conseheronan cu den un tempo di un luna, e cifranan real a keda conoci.

Prome Minister Sra Evelyn Wever ta afirma cu e punto di bista di Gobierno ta pa cumpli cu ley y cu presupuesto balansa sinembrgo na e momentonan ey esaki no tabata posibel y nos mester a bay den dialogo cu nos partners aki na Aruba pa prepara tambe pa bay den dialogo cu Hulanda pa haya e tempo y espacio necesario pa nos bay bek na un presupuesto balansa y cu cifranan realistico. Y Gobierno ta hopi gradeci cu a haya e sosten aki na Aruba y Hulanda y haya e espacio pa presenta e trayectoria nobo pa yega na un presupuesto balansa.

PRIORIDAD PA ATENDE PROBLEMANAN SOCIAL:
Prome Minister di nos pais a considera cu e crisis social ta mas grandi ainda cu nos crisis financiero saliendo for di e punto di bista cu den apenas un paar di dia di gobernacion, a wordo confronta cu un otro crisis, un crisis social. Aruba a wordo confronta cu e morto cruel di Rishandroh y Eugene cu lamentablemente tabata e punto na unda cu Aruba henter a realisa cu problemanan social di nos pais ta mas grandi cu loke nos a pensa.

Y e enfoke a cambia y nos a realisa cu e problema social ta mucho mas grandi cu nos problema financiero y lo haya atencion adecua di e gobierno aki al contrario di e gobierno anterior. Haci tur esfuerso pa realmente pone e ser humano central ta keda e compromiso di Gabinete Wever-Croes. Y lo cuminsa cerca nos muchanan pa brinda nan proteccion, cariño y oportunidadnan di bida.

E mandatario ta enfatisa cu esaki lo tipifica aña nobo nos dilianti. Mesora, Gobierno di Aruba a atende cu e crisis social aki. Y hunto cu departamentonan social concerni, a pone plannan riba mesa y ya a cuminsa traha pa desaroya tur e plannan aki. Nos muchanan ta prioridad pa e gobierno aki.
Pa Gobierno di Aruba, pone e ser humano central, kiermeen pa haci Aruba sigur un biaha mas, un luga dushi pa biba, unda nos por lanta nos yiunan. Un Aruba cu ta brinda oportunidad na nos hubentud pa estudio y empleo. Oportunidad pa nos mamanan soltero. Cuido digno pa nos grandinan. Esaki ta e compromiso di Gobierno di Aruba

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio