E luna aki gobierno nobo a haya su mes obliga di efectua retiro di tur ex coordinador di ministernan di AVP pasobra gobierno di AVP a purba hinca tur den aparato gubernamental como ambtenaar. Esaki ta contra e propio maneho di gobierno di AVP di “personeelsstop”.
Como 300 coordinador di ex ministernan di AVP cu salario barbaro te na 17 mil florin pa luna y cu no a aparece mas na trabou desde eleccion, a ricibi nan carta di retiro e siman aki informando nan cu nan lo ricibi ainda pago di januari 2018.
Prome Minister di nos pais, sra Evelyn Wever-Croes ta duna di conoce cu ta lamentabel ta cu gabinete Mike Eman mes no a regla e papelnan di e ex coordinadornan aki na tempo y awor ta ataca gobierno nobo pa nan propio falta.
“Esnan cu a haya nan carta di retiro ta esnan di cual gobierno di AVP a duna “vaste dienst” como ambtenaar net prome y despues di eleccion. Tur e decisionnan ey a base di maneho di gobierno di AVP mes ta ilegal y invalido pasobra nan ta tuma den periodo di “afscheidsbeleid” y periodo di gobierno demisionario. Pues Mike Eman mes a perhudica su hendenan!
Locual ta condenable ta cu Mike Eman den su atake a parce di a perde cabes y a insulta directora di Departamento di Recurso Humano di Gobierno.
“Ta hopi tristo cu sr. Eman a reacciona na un forma asina negativo y baho insultando un dama profesional. Mi kier bisa Mike Eman cu ta ami ta su oponente, pues si e tin algo di critica, critica ami y no ofende e profesionalnan den gobierno. Mike Eman mester tin berguensa di sali na defensa di su actonan incorecto. E palabracion tabata cu bo ta bin cu coordinadornan y bo ta bay cu nan.
Eman no a bay cu nan, el a benta nan den mi scochi y awor e ta sapatia pasobra e kier pa ami bay carga cu e erornan di Mike Eman. Nos ta un gobierno nobo cu a bin pa pone un paro na e bagamunderianan di e gobierno anterior.
Cu esnan envolvi ta decepciona mi ta compronde, pero nan mester realisa cu ta nan propio partido AVP a laga nan na caya. Asina mes nan a ricibi 4 luna salario extra despues di eleccion, pa evita cu nan bisa cu nos gobierno no ta humano.
Lagami duna un ehempel: mi mester a termina un contract di un ex coordinador di Mike Eman cu tabata gana 17 mil florin pa luna. Mike Eman a prolonga su contract dia 1 di september 2017 pa un aña te 1 september 2018.
Ningun hende ta haya ta husto cu pueblo mester sigui paga e meneer aki cu no a aparece na trabou, 17 mil florin pa luna pa 10 luna mas! Y pesey nos a termina e contract cu Mike Eman gusta of no.
Nos a bisa cu nos ta bin bek cu orden y respet y esey nos a haci. Poniendo e ser humano central, nos a informa esnan en cuestion cu suficiente anticipacion y nos a paga nan un luna extra.
Mi ta conseha Mike Eman pa e pensa bon si ta den e forma descabeya aki e ta bay sigui su politica di insulta profesionalnan di gobierno, pasobra e ta un politica hopi baho y anticua cu henter Aruba a rechasa, y cu por cierto ta ridiculisa Eman mes. Un ex prome minister di pais Aruba no ta suppose di comporta su mes asina” Evelyn Wever-Croes a duna di conoce.