Minister Encarga cu Turismo, Salubridad Publico y Deporte, Sr. Dangui Oduber conhuntamente cu Minister Presidente Sra. Evelyn Wever Croes a pasa bishita diferente instancianan, entre otro, Helping Hands Foundation, Casa Cuna y Cas Sjabururi pa asina hasi e donacionnan.
Minister a pasa un rato agradabel na cada fundacion y a wordo ricibi den un ambiente caloroso. Cada un di e fundacionnan ya menciona ta traha hopi duro pa por yuda esnan den necesidad y ta hasi esaki tur dia cu hopi amor y cariño. Pero hopi biaha nan ta haya nan mes limita na sea personal pa yuda traha na e fundacion of materialnan necesario pa cuido di e muchanan of pashentnan.
Minister Dangui Oduber tawata sumamente orguyoso pa por a yuda contribui y ta priminti di sigi aporta den futuro na esnan cu ta mas den necesidad. Pero esaki ta solamente e comienso. Minister Dangui Oduber den transcurso di siman lo pasa bishita mas fundacion pa asina duna su aporte, caminda e ser humano mester ta central.