Home Politics E dianan prome cu aña nobo: AMBIENT’I FIN DI AÑA TA SIGUI...

E dianan prome cu aña nobo: AMBIENT’I FIN DI AÑA TA SIGUI DEN CAYA BETICO CROES Cu bendicion di nos tradicional Dande y hopi premionan atractivo

SHARE

Dos siman pasa, Gobierno di Aruba a institui un comision pa trece bida y ambiente bek den Caya Betico Croes den e temporada di fin di aña. E comision ta consisti di representantenan di diferente ministerionan di Gobierno kendenan a bin hunto pa plania Ambient’i fin di Aña den Caya Betico Croes. Prome Miniter Evelyn Wever-Croes ta wordo representa door di Sra. Lindy Croes kende ta un comerciante cu riba su mes a trece varios actividadnan pa trece movecion den Caya Betico Croes. Sra Croes ta elabora mas riba e actividadnan cu lo bay tin e ultimo dianan di aña e fin di siman aki.

“E meta di e actividadnan di fin di aña ta pa trece un ambiente diferente den Caya Betico Croes sperando cu esaki lo continua henter aña 2018 pa asina nos centro di ciudad haya bida bek y negoshinan por florece y crece manera cu antes tabata e caso y publico por yega mas constantemente pa haci nan compranan den centro di nos ciudad.

E fin di siman aki, prome cu nos yama 2017 ayo, Ambient’i fin di Aña lo ta grandi atrobe cu diferente atraccionnan pa nos comunidad. Riba diabierna y diasabra, e orarionan di operacion di e tiendanan ta keda normal y algun tienda lo habri nan porta riba dia 31 pa cende nan pagara.

Artistanan local Niro y Zyon lo trece ambiente musical diabierna atardi. Pa diasabra lo tin Dande den Tram. Y tipico Ta Cla lo deleita un y tur cu musicanan pa trece e ambient’i fin di aña. Jeon lo duna su concierto pa cera Ambient’i fin di Aña cu un toke special.

Lo tin diferente entretenimientonan pa nos muchanan incluyendo Santa Claus kende ta warda tur mucha pa bin saca potret pa keda cu un recuerdo special. Pa esnan di mas chikito lo tin Dino Jump. Lo tin hopi sorpresa mas y hopi premionan atractivo incluyendo 50 bais, “weekend stay” y hopi mas.

Sra. Lindy Croes ta gradici Gobierno di Aruba y Prome Minister Evelyn Wever-Croes pa e iniciativa aki pa brinda Aruba un tremendo Ambient’i fin di Aña. Danki na cada comerciante cu a aporta na e exito di e proyecto y cu a kere den esaki. Un danki tambe pa tur sponsors cu a coopera cu premionan atractivo.

E fin di siman aki, ban topa den Caya Betico Croes. Trece henter famia y invita amistadnan pa topa y haci ultimo compra prome cu aña caba pa asina disfruta di mas ambiente y sorpresanan cu Comision Caya Betico Croes a prepara.