Un otro Pasco y fin di aña ta den porta, un temporada caminda nos ta celebra e nacemento di nos Bon Hesus, simbolo di speransa pa tur ser humano.
Un temporada di celebracion pa hopi di nos, pero tambe un temporada di refleccion.
E mensahe di amor cu e yegada di Hesus na mundo a trese pa nos, mester ta un ehempel di e amor, unidad y respet cu nos lo mester tin pa nos prohimo.
Den un mundo yen di stress y anshamento, laga nos para keto un rato y reflecciona riba e bendicionnan cu nos Bon Dios a otorga na nos. Sin lubida cu e malonan cu por a pasa den nos bida ta parti di e pruebanan cu nos Creador a pone den nos caminda, pa asina hasi un mihor persona di cada un di nos.
Laga e pasco aki ta uno di unidad den famia, pero tambe di consideracion pa cu nos prohimo.
Hopi biaha dor di ocupacionnan diario nos ta lubida cu un di e mensahenan cu Hesus a trese pa nos ta pa stima bo prohimo manera bo ta stima bo mes.
Ban tuma un tempo den e dianan di fiesta aki pa yuda esnan cu mas mester di nos. E recompesa no lo ta uno financiero, pero e sentimento di satisfaccion cu amor desinteresa ta laga pa nos, ta uno cu ningun rikesa na mundo lo por paga p’e.
Nan sa bisa cu ora e deseonan ta sincero y ta bin di curason, nan ta bira realidad pa es cu ricibi nan. Ta pa es motibo cu pa e dianan di fiesta aki mi kier desea abo y tur bo sernan keri, tur e felicidad di mundo.
Bon Pasco y cu e aña 2018 venidero ta uno yena cu dicha y felicidad pa henter nos pueblo di Aruba!