ORANJESTAD, Aruba – Marriott Resort Aruba Stellaris Casino a tene celebracion pa Hubert Kip pa su logro y nan a invita Aldrick Farro kende tambe a gana un premio durante e AHATA Excellence Award. Marriott Resort Aruba Stellaris Casino ta orguyoso cu 2 di nan asociado a logra bay cu premio.
Aldrick Farro ta manager di engineering y el a gana e premio di “Manager of the year 2017”, di cual e tin 5 aña den e industria di turismo trahando na Marriott Resort. El a cuminsa traha den e departamento di IT, unda e tabata maneha tur 3 propiedad y despues cambia di departamento engineering. Den e departamento aki Aldrick Farro ta manehando tur proyecto di Marriott.
E experiencia di traha den e industria di turismo ta uno completamente apart pa Aldrick Farro. El a yega di traha den refineria y e trabou cu e tabata haci no tin nada di haber cu turismo. Trahando den e industria aki ta un mundo diferente y hopi interesante, pasobra no tin un dia cu ta mescos den e trabou di turismo. Gana e premio di manager di aña esaki tabata un sorpresa pa su persona, pasobra e no tabata sa cu lo a nomina su persona. “E anochi ey tabata un sorpresa tambe, sigur ora cu nan a anuncia mi nomber. E tabata un sorpresa grandi pa mi”, el a expresa.
E industria di turismo ta uno interesante, di cual un persona mester duna hopi di su parti tur dia ta e conseho cu el a duna. “E placer cu bo ta haya di dje, e satisfaccion cu bo ta haya di dje ta hopi grandi”, asina Aldrick Farro a expresa. Specialmente ora di mira e bishitantenan ta cana contento y no tin un manera pa describi esey. El a traha 18 pa 19 aña den refineria te ora cu esaki a cera y el a ricibi un oportunidad na Marriott, pero e manera con un persona ta ricibi e guia na e resort aki ta pone cu bo instinto ta cambia. E parti di hospitalidad ta cambia den un persona y ta haci esaki uno interesante.
Aruba Marriott Resort & Stellaris Casino a habri na aña 1995 y ta e casino mas grandi riba nos isla. E ta conta cu mas di 160 empleado, cu ta maneha 24 wega di mesa y casi 500 slot machines. E weganan mas popular riba mesa ta Craps, Black Jack, Three Card Poker y Roulette, mientras cu e mashinnan mas uza ta esunnan di e sistema 3D y e “mystery Progressive Jackpots”.
Stellaris Casino ta conta cu entretenimento bibo, diadomingo pa diaranson di 9:00pm pa 1:00am cu un live DJ, diahuebs pa diasabra di 9:00pm pa 1:00am cu diferente banda live.
E casino ta habri 24 ora pa dia pa weganan di mashin mientras cu weganan di mesa ta cuminsa pa 4:00pm te cu 4:00am.
Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.