Home Politics Departamentonan social a traha un plan di emergencia CONSEHO DI MINISTER A...

Departamentonan social a traha un plan di emergencia CONSEHO DI MINISTER A APROBA E “CRISIS PLAN” CU 10 PUNTO IMPORTANTE RIBA TERENO SOCIAL

SHARE

Aruba ta sinti cambio ora cu traha hunto cu un meta

Den Conseho di Minister diabierna mainta tabata tin un reunion unda a trata diferente puntonan di agenda cu e gobierno aki lo mester bay atende cu nan urgentemente.

Prome Minister Evelyn Wever-Croes a indica cu Minister di Asuntonan Social Sr. Glenbert Croes tin algun siman caba trahando riba e problemanan social di Aruba. Manera tur hende sa Aruba a keda sacudi pa e morto cruel di e dos angelitonan Rishandroh y Eugene y desde e momento ey e enfasis a cambia na Aruba.
E mandatario a expresa cu si tabata tin hende ainda prome cu e hecho aki cu tabata pensa cu problema social no ta importante y ta solamente traha caya bunita y brug caro lo a soluciona e problemanan aki, awor aki tur hende na Aruba ta di acuerdo cu problemanan social mester wordo atendi.

Prome Minister a duna di conoce cu Minister Glenbert Croes hunto cu full un team grandi di departamentonan cu ta resorta bou di e Ministerio di Asuntonan Social pa un paar di siman caba a cera cabes hunto y dia 5 di december 2017 a presenta un plan di emergencia, loke cu a wordo yama un ‘Crisis Plan”. Den e Crisis Plan aki a bin cu dies punto pa Conseho di Minister tuma decision riba nan. Y ta mesun momento ey tambe a tuma e desicion y a eleva e tematica di problemanan social na e nivel nacional pasobra ta un explocion social nos tin y nos a pone bou di Minister President. Gobierno cu e desicion aki ta mustra cu ya e no ta problema mas pero ta un asunto di tema nacional por lo tanto tur Minster ta encarga cu n’e.

Den Conseho di Minister, Minister Glenbert Croes a bin cu e prome plan di ehecucion. E medidanan di emergencia a wordo presenta y cua desicionnan lo bay tuma y kico cada departamento tin mester pa nan funciona optimalmente. Tur minister presente den Conseho di Minister a bay di acuerdo cu e plan cu a keda presenta.

E mandatario a enfatisa cu awo ta keda na e Ministernan pa wak con lo cumpli cu e contenido di e plan aki financieramente. Esaki ta un decision sumamente importante cu a wordo tuma. Y cu esaki nos kier mustra e sosten na tur esnan cu ta traha den e area social cu a traha duro riba e plan aki y presenta cuanto e gastonan ta.

For di esnan cu ta traha den Departamento Social, a haya sa cu esaki no ta prome biaha cu nan a entrega un plan asina. Pero ora nan a presenta e gastonan, e gobierno anterior a spanta y pone esaki den lachi y prefera di uza e cen pa embeyece, cu klinker y asfalt.

Prome Minister, cu un expresion di siguridad a bisa: “Awe nos a marca e diferencia. Awe nos a mustra cu e ser humano ta central. Y aunke cu e gastonan envolvi cu e plan aki ta enormamente halto, nos ta pone ser humano central y nos ta percura pa e placa aki bin riba mesa”.