Coalicion di partidonan MEP, POR y RED ta keda cu e compromiso pa pone e ser humano central di berdad
Den su discurso den e tratamento di ley di presupuesto supletorio den Parlamento diaranson, Prome Minister Evelyn Wever-Croes a expresa cu tabata un honor y orguyo grandi p’e pa dirigi su mes pa prome biaha como Prome Minister di nos pais den e reunion publico.
Sinembargo Prome Minister a expresa cu e lo a desea di trata un di e leynan cu Gobierno a compromete su mes cu nos comunidad pa trece alivio den e dolornan di nos pueblo. Pero lamentabel ta cu e prome tema cu e gobierno di Gabinete Wever-Croes ta trata den su prome salida ta e tema financiero.
Como Minister Presidente Nobo di nos pais, e mandatario ta bisa cu el a encontra hopi reto. Retonan conoci y algun no conoci. Pero irespecto e retonan aki, e mandatario a reitera cu e coalicion di partidonan MEP, POR y RED ta keda cu e compromiso pa pone e ser humano central di berdad.
E mandatario ta bisa cu 2017 tabata un aña den cua a experimenta varios cambionan. Cuminsando cu nos campaña electoral cu tabata diferente na tur e otro añanan na unda a cuminsa pone mas enfasis riba e contenido di descucionnan y debatenan lagando tur show y promesanan falso un banda. Otro cambio importante tabata e deseo di pueblo pa un gobierno di coalicion na unda tres partido di diferente vision pero cu un meta comun di pone e ser humano central. Un resultado cu den 20 aña no a mira.
Prome Minister a duna algun palabranan di reflexion na e pueblo bisando cu tur cos den bida tin su motibo. Den e momentonan aki cu Aruba ta confronta retonan asina grandi, ta momento cu nos mester uni. Den pasado Aruba a enfrenta retonan grandi den pasado y ta den union nos a logra surpasa e retonan aki. Y na e momento aki, cu nos tin un reto economico asina grandi laga atras pa e gobierno saliente, nos mester uni. Y ohala cu e union di e tres partidonan aki refleha den nos comunidad pa hunto nos tur enfrenta e retonan nos dilanti.