ORANJESTAD – Den presencia di Gobernador di Aruba Sr. J.A. (Alfonso) Boekhoudt, drs. Lay Hing de Kort –Yee y mr. R.C. (Rick) Samuels a huramenta y duna promesa respectivamente.
Cu e acto aki, cu a tuma luga riba dialuna 18 di december 2017, nombramento di drs. de Kort -Yee y mr. Samuels como e miembronan mas nobo di Corte di Auditoria a keda formalisa.
E ceremonia a conta cu presencia di Sr. R. de Kort, Sra. L. Malmberg, e hoben S. Oduber, y e hobencitonan C.M. Samuels y I.K. Samuels y representando Corte di Auditoria tabata presente su presidente interino, mr. Frederick Nuboer.
Cu nombramento di drs. de Kort y mr. Samuels un biaha mas Corte di Auditoria ta completo. Ta asina cu desde 1 di januari 2015 a crea un vacatura cu partida di Sr. Gabriel Werleman y entrante 31 december 2016 tabatin un di dos vacatura cu partida di drs. Ling Wong. A selecta drs. de Kort – Yee y mr. Samuels door di un procedura di solicitud habri y Corte di Auditoria a recomenda nan como miembronan nobo.
Corte di Auditoria ta contento cu e nombramento di drs. de Kort – Yee y mr. Samuels y ta conta riba un bon colaboracion.