Home Politics Parlamentario Rocco Tjon: Traspaso di gobierno ta hopi importante, paso gobernacion ta...

Parlamentario Rocco Tjon: Traspaso di gobierno ta hopi importante, paso gobernacion ta continuacion y pesey mes mester percura pa reglamenta bon e traspaso

SHARE

E Parlamento aki ta dicidido pa trece cambionan structural, cambionan duradero,  pesey lo percura pa e traspaso di trabounan ora Gobiernonan cambia ta ancra den ley, pa asina percura cu tin enberdad continuacion pa loke ta trata trabounan.

Oranjestad, Aruba: Comision di Asuntonan Hudicial, a trata e tema di traspaso, mirando cu e traspaso di material tabata e topico di discusion actualmente den nos comunidad. No ta solamente e traspaso di material no a bay na un forma corecto, pero tambe e traspaso di e trabounan di Minister no a bay na e forma di mas corecto of te hasta por a bisa cu no tabata tin traspaso mes, cu a tuma luga.

Siman pasa e Comision di Asuntonan Hudicial, precedi pa Parlamentario Tjon, a reuni cu e Minister di Husticia, Mr. Andin Bikker. Durante e reunion a haci e Minister e pregunta: Con e traspaso di mando a bay? Pasobra  tin hopi lopende zaken, cu lo mester a wordo atendi mesora cu nan. E contesta di e Minister tabata, cu practicamente nada no a wordo traspasa, den e sentido cu asuntonan cu ta andando den husticia su persona no a wordo informa di nan.

Aki ta papiando di proyectonan grandi, pero tambe por ehempel di reorganisacionnan cu ta andando, desicionnan cu mester a wordo tuma den e reorganisacionnan aki,  cu tin consecuencianan pa por ehempel tur e personal di KIA, pero tambe di Cuerpo policial. E tema aki ta hopi importante pa continuacion di e trabounan cu a tuma luga caba, no solamente di trabounan chikito, pero desicionnan cu mester a wordo tuma por ehempel pa rechtspositie di e ambtenaarnan, rechtpositie di detenidonan, si acaso nan ta na e momento cu por bay cu verlof, e Minister mester ta na altura di tur e dossiernan, pa ora e mester tuma e desicionnan aki, su persona sa kiko ta andando.

Segun Parlamentario Tjon, constant ta scucha, si pero 8 aña pasa y 8 aña kiko, cua di e ministernan actual tabata ta minister 8 aña pasa, cu nan lo por a percura pa un traspaso no mucho bon a tuma lugar e tempo ey. Si acaso e traspaso 8 aña pasa no tabata uno bon dicon e ministernan saliente, no a percura pa no haci mescos of pio pero haci’e mihor. Pa e motibo aki a yega na un palabracion den e Comision di Asuntonan Hudicial cu lo percura pa reglamenta e traspaso di trabounan di un minister pa ley tambe.

E ta algo hopi preocupante si e tipo di actonan aki keda tuma lugar. E parlamento aki ta dicidido pa trece cambionan structural, cambionan duradero, pesey lo percura pa e traspaso di trabounan ora Gobiernonan cambia ta ancra den ley, pa asina percura cu tin enberdad continuacion pa loke ta trata trabounan di ministernan, paso na final di dia esunnan cu ta sali perhudica ora no tin un traspaso eficiente y efectivo ta e comunidad y e ambtenaarnan cu ta traha den e diferente  organisacion.