Home » Parlamentario Rocco Tjon di MEP: Ta explorando tur e posibilidadnan pa haci KIA, un Prizon Sostenibel

Parlamentario Rocco Tjon di MEP: Ta explorando tur e posibilidadnan pa haci KIA, un Prizon Sostenibel

by Admin
0 comment 51 views

Parlamentario Tjon a reuni cu Minister di Husticia actual, nan a papia basta largo tocante KIA y tambe e concepto cu lo bay wordo introduci y ta explorando e posibilidadnan caba, pa yega na un concepto cu nan ta yama na Hulandes “duurzame gevangenissen”, prizonnan sostenibel.

Oranjestad, Aruba: E traspaso di mando di ex Minister di Husticia pa e Minister di Husticia actual a bay malo y cu consecuencianan muy en particular tambe pa loke ta nos Instituto Coreccional Nacional, KIA.  Tin hopi proyecto andando na KIA, proyectonan hopi grandi cu tin consecuencianan  grandi tambe pa e organisacion y na final di dia pa pais Aruba, pasobra un instituto correcional ta wordo geaudit riba diferente aspectonan y si bo wordo geaudit negativo door di organisacionnan internacional, manera CBT, e tin consecuencianan grandi pa pais Aruba, pesey ta hopi preocupante cu e traspaso no a tuma luga corectamente, pasobra tin proyectonan wardando riba desicionnan cu mester wordo tuma.

Parlamentario Rocco Tjon a reuni cu Minister di husticia tocante KIA, anto e concepto cu lo kier pa wordo introduci y ta explorando caba e posibilidadnan, pa yega na e concepto cu nan ta yama “duurzame gevangenissen”, prizonnan sostenibel. Esaki ta hopi importante, pasobra e ora ta bay duna contenido na un infrastructura sostenibel pa cu e prizon.

Loke ta trata e detenidonan cu mester integra bek den comunidad, ta bay papia di integracion sostenibel, pa evita di haya mane nan ta yama na Hulandes “Draaideur criminelen”, cu kemen cu detenidonan ta sali for di KIA y despues di un par di dia nan ta bek na KIA. Integracion Sostenibel ta encera programanan sostenibel den KIA mes, haci e programanan aki bira auto suficiente y tambe personal sostenibel.

E importancia di e esaki ta cu KIA ta wordo geaudit riba masha hopi aspectonan mes y si KIA tin un sistema sostenibel, esaki lo percura pa KIA wordo geaudit positivamente riba tur e aspectonan, manera e aspecto di siguridad, aspecto di infrastructura, aspecto di e cantidad y calidad di programanan cu ta brindando na e detenidonan den KIA.  Na final di dia esaki ta bay eleva e siguridad pa e personal. Un aspecto cu no por lubida, ta personal sostenibel cu mester bin tambe cu un opleidingsplan, un meerjaren opleidingsplan cu porcierto tabata existi caba, pero na dado momento e plug a wordo ranca for di e opleidingsplan aki. Esaki tambe a wordo papia caba cu e Minister y esaki pronto lo cuminsa bek.Hopi importante den e concepto aki ta, cu lo bay baha gastonan operacional, paso un aspecto semper cu ta causa cu e calidad di un prizon ta bay atras, ta debi na e gastonan halto aki.

Un prizon ta rekeri hopi recurso pa por percura pa e keda draai y si e gastonan ta mas halto cu e entradanan logicamente e estado di prizon lo bay atras. E concepto di un prizon sostenibel ta bay baha e gastonan, anto e programanan cu ta bay draai, lo percura pa tin entrada cu lo por wordo inverti mesora bek den e prizon, den su mantencion, den e programanan cu na e prizon mes por wordo organisa pa e detenidonan.

E programanan aki, na final di dia lo percura pa eleva e siguridad pa e personal tambe, esaki ta un aspecto sigur cu ta preocupa e personal di KIA, cu ta e circumstancianan di trabou. Un proyecto asina lo por percura pa e circumstancianan di trabou wordo mehora y eleva.  Parlamentario Tjon no kier pa bin cu window dressing, pero bin cu solucionnan duradero. Tin hopi inversionnan cu mester wordo haci na KIA y no ta un secreto publico, paso tin raportnan cu ta publico y cu ta indica esaki tambe.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio