ORANJESTAD, Aruba – Diabierna scol Bibito Pin a tene nan celebracion di Pasco y a ricibi bishita di sorpresa di Santa Claus, cu a yega hunto cu empleadonan di Riu Palace Antillas. Durante e bishita aki e hotel Riu Palace Antillas a haci un donacion special na e scol.
Gerente General di Riu Palace Antillas, Juan Blanco, hunto cu e team di entretenimento di e hotel a presenta na e scol y a entrega e muchanan yen di regalo. Santa Claus y su ayudantenan di Riu Palace Antillas a entrega cada mucha un regalo, loke sigur a percura pa hopi sonrisa y alegria riba nan cara.
Un juffrouw di scol Bibito Pin a bisa despues di e ceremonia cu nan a keda masha contento cu Riu Palace Antillas, pa e donacion p’e muchanan y a gradici nan p’e regalonan, tambe p’e bishita di Santa Claus. Hopi biaha ta lubida riba e muchanan aki, asina el a comenta. E grupo tabata varia di edad y nan tabata contento di a ricibi nan regalo for di Santa Claus. E team di entretenimento a percura p’e muchanan pasa un momento agradabel unda cu a haci algo leuk cu nan.
Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “all inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.
Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.