Home Local Despues di a pasa 8 caminda di paranda Paranda di Balashi a...

Despues di a pasa 8 caminda di paranda Paranda di Balashi a culmina cu ambiente di 3 banda y Metropolis

SHARE

ORANJESTAD, Aruba – Dia 13 di October e Paranda di Balashi a inicia y pa 10 diabierna na diferente luga tabatin ambiente di Paranda di Balashi, unda cu Grupo di Betico, Rincon Boyz y Metropolis a bini hunto pa pone publico pasa un rato agradabel. Diabierna 15 di December Paranda di Balashi a culmina na Urataca Center, unda cu un hopi hende a yega hunto pa asina disfruta di e anochi aki di e canticanan di Grupo Betico, Rincon Boyz Robert Jeandor y su Solo Banda Show y Metropolis.

Mitch Bermudez, brand manager di Brouwerij Nacional Balashi & Tropical Bottling Co., a indica cu e aña aki Paranda di Balashi a kibra tur expectativa cu nan tabatin, di cual diabierna tabata e ultimo Paranda di Balashi. Durante e di 2 siman di October na Linear Park a cuminsa cu un evento grandi di Paranda di Balashi cu 2 stage grandi y despues a pasa 8 luga pa asina por a termina na Urataca Center asina Mitch Bermudez a expresa.

E aña aki Brouwerij Nacional Balashi a bin cu luganan nobo y durante e Paranda di Balashi hopi hende a yega den gran forma. “Unda cu nos bay, Paranda di Balashi ta keda un concepto cu nos ta purba di bay mas area posibel na Aruba”, el a expresa. Brouwerij Nacional Balashi & Tropical Bottling Co. kier purba cover tur area di Noord pa San Nicolas y bek. Hopi hende a yega na e Paranda di Balashi, unda cu nan a bende hopi cerbes Balashi y Chill.

Pa 19 aña ta existi Paranda di Balashi y esaki a cuminsa door di e persona cu a traha e cerbes Balashi pa prome biaha aki na Aruba, cu tabata na 1999. Y durante e añanan a haci esaki pa 10 siman y lo sigui mantene esaki asina aki, el a expresa. Esaki ta algo cu ta trece e esfera di fin di aña y p’esey ta cuminsa cu e Paranda di Balashi na October y ta termina na December. Tur aña nan ta scoge pa sigui cu Grupo Betico, cual banda ta trece e ambiente e musica di fin di aña y di Pasco.
E aña aki Brouwerij Nacional Balashi & Tropical Bottling Co. a haci cambio, unda cu a bin cu Rincon Boyz y Robert Jeandor. Y den añanan venidero lo sigui amplia esaki. Mitch Bermudez a sigura cu na 2018 lo tin e Paranda di Balashi.

Brouwerij Nacional Balashi & Tropical Bottling Co. a gradici pueblo di Aruba pa nan sosten, tambe a gradici nan pa presencia e 10 diabierna na tur evento di Paranda di Balashi. “Nos ta sumamente contento y orguyoso di por conta cu boso sosten. Y cu esey Brouwerij Nacional Balashi & Tropical Bottling Co. ta desea tur hende na Aruba y rond mundo feliz dianan di fiesta”, asina Mitch Bermudez a termina bisando.