Manera ya ta conoci, e caso di e dos criaturanan cu a bay laga nos, a sacudi nos profundamente como nacion. Esey a conduci Minister Glenbert Croes na tuma accion inmediato y den apenas un siman den su funcion como Minister, a convoca un reunion cu tur instancia concerni.
Colectivamente, tur a cera cabes reconociendo e gravedad di e situacion y despues di diferente consulta, a presenta e Plan di Emergencia Social riba 5 di december na Conseho di Minister cual a conta cu aprobacion total.
Despues di esaki a sigui cu e diverso reunion- y consultanan y riba 19 di December, e comision a presenta na Minister Glenbert Croes e Plan di Accion pa Rescate y Inversion Social.
Minister, e siman aki ainda, lo present’e den Conseho di Minister pa por haya e aprobacion pa e gastonan implica cu mester keda inclui como inversion adicional den presupuesto 2018 pa despues ehecuta e Plan di Rescate aki.