Minister di Transporte, Comunicacion y Sector Primario, sr. Chris Romero, un docente di curason, a keda sumamente contento cu e hecho cu tur scol na Aruba lo haya WIFI gratis. Desde inicio di su carera politico na 2005 semper e mandatario a vocifera cu “digitale leeromgeving” lo mester ta un di e metodonan cu mester wordo treci den enseñansa na Aruba. Mundialmente esaki ta e sistema cu ya caba ta wordo implementa y den e mundo di technologia digital Aruba no por keda tras.
Como Minister di comunicacion, Chris Romero a felicita Minister Armando Lampe y Prome Minister Evelyn Wever-Croes cu apenas algun siman den gobierno, ya e pueblo por wak e cambionan cu a papia di dje pa hopi tempo y tambe durante temporada di campaña.
Minister Romero a expresa cu ora cu e proyecto aki a wordo presenta na Conseho di Minister, unanimamente tur Minister a bay di acuerdo cu esaki.
A wordo dicidi cu e suma di FDA di 1 miyon florin cu a resta pa enseñansa pa aña 2017 wordo reparti den parti igual pa tur scol na Aruba, y e miho decision tabata pa uza esaki dunando WIFI na tur scol.
Sinembargo e proyecto a surpasa e cantidad disponibel di FDA cu tabata tin pa e motibo aki tambe Minister di Comunicacion Chris Romero hunto cu SETAR a coopera haciendo un financiamento di 40 mil riba e diferencia pa asina e proyecto wordo realisa y pronto tur scol lo haya WIFI cu un volocidad optimal.
Minister Chris Romero a gradici Director di SETAR, sr. Roland Croes y su ekipo cu a traha duro y a bay te hasta e “extra mile” pa asina e acuerdo di e proyecto aki wordo firma y e plan por wordo implementa y tur scol por disfruta di WIFI mas pronto posibel.