ORANJESTAD, Aruba – Diasabra dia 9 di December ATCO Concrete tabatin nan ultimo “Yard Sale” pa e aña aki. E evento aki a bira un tradicion caba y clientenan, tanto comercial como residencial ta spera riba dje. Hopi a pasa na ATCO Concrete pa probecha di prijsnan special cu tabatin pa ofrece y tambe por a aprecia e productonan nobo.
Geraldine Oduber, Sales & Marketing Manager na ATCO Concrete a indica cu durante e “Yard Sale” casi tur material tabatin descuentonan atractivo, cuminsando desde e Ready Mix Concrete pa esunnan cu tabata kier a basha fundeshi, ringbalk, vloer te riba tur tipo di bloki manera esunnan regular, split blok of hollow blocks.
El a indica cu a ofrece 17.5% descuento riba pavers, tambe ATCO Concrete a presenta e dia aki un paver nobo. Esaki tabata e city line pavers. E modelo aki ta di 6 centimeter, tambe e ta hopi mas strak y moderno. E city line pavers aki ta bin den diferente color cu ATCO Concrete ta produci, asina Geraldine Oduber a indica.
Pa varios aña caba ATCO Concrete ta organisando nan “Yard Sale” unda cu hopi hende ta probecha busca e materialnan cu nan mester, specialmente pa e dianan di fiesta.
E dia aki no solamente e clientenan a disfruta di e descuentonan, pero tambe nan a haya coy come y co’i bebe y na mes momento por a disfruta di e ambiente di Pasco cu presentacion di Gaita Autentico.
Desde aña 1990 a crea ATCO Concrete, e tempo ey riba parkeerplaats di Hyatt Regency Hotel & Casino. Esaki tabata nan di dos cliente, e prome tabata Sonesta Hotel. Na 1992, ora a caba cu construccion di Hyatt, a muda pa nan edificio actual na Barcadera. Ta bon pa bisa cu na un principio e compania a inverti den un planta di concret cu por a produci 8 m3 den mey ora. Asina nan por a produci 16 m3 pa cada ora di produccion. Mientrastanto, den e añanan, debi na demanda y mercado, a inverti den un di e plantanan di concrete mas grandi y moderno den region, cu ta produci 120 m3 pa ora.