Santa Cruz – Diaranson anochi algo prome cu 7’or alarma a wordo bati pa un damita di mas o menos 16 aña cu a wordo gedal door di un auto.
E incidente lamentabel aki a sosode pabou di e rotonde di Santa Cruz, dilanti e dentista.
Na e sitio e auto Hyundai cu a dal e.
Segun nos a compronde ta cu e damita aki tawata crusando, di zuid pa bin nort.
Aparentemente un auto lo a duna chance pa crusa, pero e Hyundai patras kizas pura a bay pasa na su man drechi y lo no a wak e damita y ta dal e.
Un impacto basta duro, cu tawata precisamente den e skina drechi abou di e windshield.
E damita a sufri basta lesion na cara y cabes cu tawata sangra. Tambe e tawata keha di hopi dolor na cabes.
Dos ambulance a presenta basta lihe na e sitio y asina a cuminsa haci e preparacionnan necesario pa transporte pa hospitaal.
Rotonde a keda cera pa un rato door di polis, pa personal di ambulance por a trata cu e victima.