Prome Alto Comisario di Polis Sr. Roland Peterson ta bay sosega

Minister di Husticia mr. Andin Bikker ta lamenta fayecimento di Aruba su prome Alto Comisario Sr. Roland W. Peterson kende a fayece dialuna mainta na edad di 76 aña. Sr. Peterson tabatin un trayectorio basta largo den cuerpo policial y na aña 1986 tempo cu Aruba a drenta Status Aparte e la haya un reto nobo den su carera pa lanta e prome cuerpo policial di Aruba como un pais nobo. Tambe Sr. Roland Peterson tabata representante di Interpol na Aruba y presidente di e comision tecnico pa Caribe y Centro America pa Interpol. No a dura mucho cu Sr. Peterson a laga e funcion di Alto Comisario y bira director di Dienst Openbare Orde en Veiligheid DOOV. Sr. Roland Peterson un ciudadano ehemplar y semper cla pa yuda den cualkier organisacion a fungi como presidente di San Nicolas Business Association. Pa tur su meritonan pa comunidad di Aruba e la haya condecoracion na 1989 como Ridder in de Orde van Oranje-Nassau. E prome condecoracion no a keda te aki y na 1995 Sr. Peterson ta haya su medaya como Officier in de Orde van Oranje-Nassau. E tabata un persona cu hopi talento y ta sa di skirbi varios buki pa mucha cu storianan interesante te na poesianan cu ta yama atencion di tur cu scucha nan. Di parti Minister di Husticia mr. Andin Bikker ta manda palabranan di condolencia na famia di Sr. Roland Peterson, su ex-coleganan polis y demas famia y amigonan. Cu Sr. Roland W. Peterson sosega na paz.