Home » Oficina di Turismo Aruba (A.T.A.) ta felicita ECO DMS cu nan 30 aniversario

Oficina di Turismo Aruba (A.T.A.) ta felicita ECO DMS cu nan 30 aniversario

by Admin
0 comment 60 views

Socio strategico den e evolucion di nos sector MICE

ORANJESTAD – Un compania bon conoci y aprecia den turismo local, ECO DMS, ta celebrando su di 30 aniversario. Pa e ocasion aki tabatin un encuentro festivo cu a conta cu presencia di clientenan fiel y otro personanan clave den e mundo di Meetings, Incentives, Conventions and Events (MICE). Pa CEO di Oficina di Turismo di Aruba (A.T.A.) Sra. Ronella Tjin Asjoe-Croes tabata un honor pa hiba palabra, caminda a resalta con e actividadnan di ECO DMS a y ta contribui grandemente na e exito di Aruba su turismo MICE.

Durante su speech, Tjin Asjoe-Croes ta menciona cu e CEO di ECO DMS, Wichita Villacres, ta un di e pioneronan den turismo cu 30 aña pasa a tuma e reto pa ofrece nan servicio den un industria nobo di turismo relativamente nobo, principalmente ora ta papia di e industria cu ta enfoca riba biahenan incentivo.

“For di comienso, Eco DMS a sa di ta un socio clave di A.T.A. trahando di cerca cu nos Aruba Convention Bureau. E industria MICE ta un segmento importante di nos industria di turismo atribuyendo pa aproximadamente 20% di Aruba su bishitantenan for di Norte America y creciendo den representacion pa loke ta trata e mercado Latino Americano,” e CEO di A.T.A. a bisa na esnan presente.

MICE ta percura pa beneficionan inmenso na e economia en general ya cu ta genera, den promedio, un nivel mas halto di consumo, ta disminui diferencia entre temporadanan (‘seasonality’), y ta stimula  innovacion y creatividad den e mercado di turismo. Na october ultimo A.T.A. a tene pa prome biaha un SITE Certified Incentive Expert Program paso ta wak e importancia di inverti den nos socionan local.

Mas aleu, den dos ocasion Aruba tabata anfitrion pa e conferencia internacional di e Society for Incentive Travel Excellence (SITE). E prome biaha tabata na 1993 y e di dos, na 2009. Pa proximo aña A.T.A., den nomber di Aruba, lo atende y patrocina un encuentro na e SITE & MPI global Forum na Roma, Italia.

Oficina di Turismo Aruba ta keda traha activamente den e sector MICE. Aruba Convention Bureau (ACB) ta traha di cerca cu hotel y companianan di maneho di destino. “Mi kier expresa tambe mi aprecio sincero pa tur nos stakeholders den e industria MICE, manera AHATA, nos hotelnan, companianan di maneho di destino, compania di transporte y otro organisacionnan cu ta traha di cerca cu ACB pa asina hiba e industria MICE na Aruba na e siguiente nivel,” Tjin Asjoe-Croes a finalisa su discurso bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio