ORANJESTAD – ARUBA, E mandatario di e gobierno nobo di Aruba Minister di Enseñansa, Sciencia y Desaroyo Sostenibel, Dr. Armando Lampe a anuncia cu dia 22 di mei proximo lo recorda cu 15 aña pasa Papiamento a bira un idioma oficial di Aruba y pa e ocasion aki “Fundacion Lanta Papiamento” a haci un peticion na Ministro di Enseñansa pa declara aña 2018 como “Aña di Papiamento”.
Minister a haya e apoyo di conseho di Minister di Aruba pa cu e iniciativa aki y a anuncia cu 2018 ta bira e Aña di Papiamento.
Nos tur ta orguyoso di nos idioma, e ta parti esencial di nos identidad como Arubiano y rond mundo tin admiracion pa Papiamento, e ta practicamente e unico den e idiomanan crioyo, cu tin literatura y hasta literatura scientifico tin na papiamento.
Banda di esey nos ta un sociedad multicultural, nos ta maneha tres otro idioma y rond mundo tambe nan ta admira con nos Arubianonan por “switch” di un idioma pa otro. Tin hopi Arubiano den exterior cu e capacidad aki y tin ta haya hopi porta cu ta wordo habri pa nan, pa e motibo cu como Arubiano nos ta maneha 4 idioma.