Un solo barco a yega un dia laat y no kier a warda pa su turno
No por benta culpa di e problemanan di e compania di barco riba waf
ORANJESTAD, Aruba: “Pa nos tur agencia ta mesun importante, tur barco ta mes importante y tur carga ta importante pa esun cu ta importe, pesey pa nos ta dificil haci distincion of discrimina un barco riba e otro”, asina Tito Tromp, gerente di operacion di ASTEC a duna di conoce. E ta referi na e criticanan den media for di siman pasa caba, ora cu barconan di carga no por a mara. El a enfatisa cu e barconan a yega laat y no kier a warda nan turno, pues e problema sigur no tabata na waf!
Teniendo na cuenta e criticanan riba e forma con ta atende cu agenda di barconan di carga, ASTEC, siendo e “Terminal Operator”, a splica cu na waf di Barcadera ta opera a base di “berth reservations” of tambe yama “scheduling” pa atende cu tur barco di carga biniendo nos isla, sin distingui compania, agencia of contenido di e barco. Mirando e cantidad di carga cu ta yega Aruba tur siman, e no ta un asunto di capacidad, pasobra ta opera solamente 35% di tempo na barconan di container, pero mas bien e ta un asunto di scheduling di e barconan.
“Nos ta tene cuenta cu carga frieu, specialmente berdura pasobra si no subi mercado mesora nan ta daña of bira bieu. Pero no ta nos culpa cu e barco ta laat. E mester atene su mes na e reservacion cu el a haci pasobra si despues di dos ora di bo reservacion bo no tey, nos ta aplica first come first serve”, di acuerdo cu Tito Tromp.
Den cuadro di por promove un bon servicio y maneho di carga di forma eficiente, Astec ta comunica cu e agencianan di barco riba scheduling di barco. Nos waf por maneha 3 barco pareu, pero no dos barco grandi di container. Por ehempel, hunto cu un barco di container un otro barco chikito pa carga y uno pa bulk. Ta bon pa agrega cu e “mobile crane” ta mas bien un “back-up crane” cu tambe por wordo uza hunto cu e “gantry” den casonan excepcional riba peticion di e agencia cu no tabata e caso siman pasa.
Pa loke ta e barco “Melbourne Strait”, ta un di e barconan di container principal y mas grandi cu ta bin Aruba y ora el a yega laat siman pasa, yegando diaranson en bes di diamars mainta trempan, a causa cu e ora ey tabatin otro barco caba aden riba su “berth reservation”. Den bes di warda pa bin na beurt (loke cu normalmente ta pasa) el a opta pa lanta su anker y bay Corsou prome pa despues regresa Aruba diasabra.
“Nos a duna e opcion pa nan drenta y pa diaranson 4:00pm descarga e barco, sigui riba diahuebs te atardi. Pero King Ocean a opta pa bay Corsou cu carga y laga Aruba warda te diasabra”, asina Tito Tromp a aclaria.
Melbourne Strait a drenta diasabra mainta cu tur containers pa Aruba y bah’e mesun dia. Cu cooperacion di Douane a opera “main gate” diasabra pa por a entrega specialmente e containernan di carga frieu, cu contenido pa supermercado y wholesalers, riba e mesun dia na comercio.
Astec lo coopera cu APA y otro stakeholdernan pa analysa kico por hasi diferente den futuro pa evita cu comunidad ta wordo perhudica. Si e agencia a avisa cu su barco ta lat, kisas comercio por a laga entrega su carganan via un otro barco. Pasobra e tres barconan di carga cu a bin siman pasa na ora si a entrega tur carga sin problema, hasta esunnan frieu.
ASTEC N.V. ta existi desde September 1983 y ta conta cu no menos di 70 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.