Home Local AHATA y Barceló Aruba a uni pa trece muchanan hunto Muchanan di...

AHATA y Barceló Aruba a uni pa trece muchanan hunto Muchanan di Casa Cuna a disfruta fiesta di Sinterklaas y Zwarte Piet

SHARE

ORANJESTAD, Aruba – Aruba Hotel & Tourism Association (AHATA) y Barceló Aruba a bini hunto pa asina e muchanan di Casa Cuna y e yiunan di e empleadonan di Barceló Aruba por a disfruta bishita di Sinterklaas y Zwarte Piet. Un total di 27 mucha di e edad 1 te cu 6 aña di Casa Cuna a pasa un rato agradabel, unda nan a canta y baila cu e Pietnan.

Tur aña Barceló Aruba ta haci un fiesta p’e yiunan di e empleadonan, pa asina nan por pasa un rato agradabel. Durante e fiesta di Sinterklaas e muchanan a haya dushi snacks y por a disfruta di show ofreci door di Barceló Aruba, mientras cu di parti di AHATA a percura p’e T-shirtnan y bunita regalonan p’e muchanan di Casa Cuna, asina Vanessa Rasmussen, representante di AHATA a expresa.

Jane Braafhart, Human Resource Director di Barceló Aruba a expresa cu tur aña nan ta haci e actividad p’e yiunan di nan colaboradornan. E colaboradornan ta cumpra un regalo y entrega esaki na e hotel, kende ta organisa e fiesta. Pa cu e fiesta, e hotel a prepara un buffet p’e muchanan por a come y tambe saconan di mangel.

Manera e tradicion ta Sinterklaas y Zwarte Piet a presenta, yama e muchanan pa mira ken ta bon mucha y mala mucha, unda cu a parti regalo p’e muchanan. “Esaki ta algo cu nan gusta masha hopi mes. Nos a ripara cu pa añanan, en bes e bay atras e ta bay dilanti”, asina Jane Braafhart a expresa. E aña aki mas di 125 mucha hunto cu nan mayor a participa na e celebracion di Sinterklaas y Zwarte Piet.

Durante e celebracion tabatin hopi animacion, di cual e Sinterklaas y Zwarte Piet tabata haci esaki. E Zwarte Pietnan tabata haci hopi ambiente, unda cu nan tabata baila y canta cu e muchanan. Tambe nan a tene competencia di baile di cual e muchanan a gosa un mundo di esaki.