“Nos mester haci servicionan mas personal”
ORANJESTAD, Aruba -“Ta cu gran entusiasmo mi ta anuncia cu mi ta un candidato pa bira un miembro di Directiva di Camara di Comercio di Aruba”, asina Wanda Broeksema, kende diamars awor ta eligibel pa representa “Grootbedijf” den e directiva di Camara di Comercio di Aruba, a duna di conoce den fin di siman.
Mi ta comparti mi vision di traha hunto pa crea un plataforma comercial den cual tin mas oportunidad den tur area di comercio pa negoshinan por re inventa nan mes. Nos por logra e vision aki si negoshinan haya e recursonan necesario y adecua y e hermentnan pa progresa y mas sosten pa por sigui construi nos economia di un forma mas solido. Servicio eficiente y personal a bira esencial den e mundo di awendia, den cual tecnologia moderno ta hunga un papel importante den e forma con ta haci negoshi.
Cu tur e posibilidadnan pa cumpra producto y servicionan via internet, Kamer van Koophandel mester demostra awor innovacion den e structura cu ta aplica servicionan na e comunidad comercial existente y tambe na e futuro comerciantenan. “Nos mester haci servicionan mas personal”.
Pa por desaroya un economia stabiel y sostenibel, basa riba principionan di industria liber y den cual ta promove competencia, nos mester aumenta e oportunidad pa negoshinan por beneficia di e tarifanan regula, di mehoracion di servicio na clientenan y dor di amplia e opcion di productonan cu ta ofrece.
Desde cu el a regresa Aruba na aña 2000, Wanda Broeksema a ocupa funcionnan den tanto negoshinan local como internacional, den cual su conocemento y experencia a crece hopi. E ta orguyoso cu awe e ta ocupa e funcion di Chief Executive Officer (CEO) di Digicel Aruba, unda e ta aplicando tur locual el a siña den e ultimo añanan, mientras e ta sigui desaroya su habilidadnan como lider.
“Si eligi mi como representante di empresanan grandi di Aruba den e directiva di Camara di Comercio, no solamente lo conta cu un persona bon educa, inteligente y disponibel pa representa tur e negoshinan, pero tambe lo por conta riba un profesional completo, apasiona y cu semper lo traha den miho interes di bo negoshi”.
Como un miembro di directiva di Camara di Comercio, mi obhetivo ta pa sirbi Bo! Mi ta invita tur doñonan di negoshi pa vota dia 12 di december proximo entre 9:00am y 12:00pm na oficina di Camara di Comercio. Mi ta conta cu Boso voto y apoyo!