ORANJESTAD, Aruba – Aña 2017 ta terminando y un biaha mas MetaCorp, e compania Arubiano cu mas aña di existencia, a organisa nan tradicional “Ham Event” pa empleadonan. Desde oranan trempan e preparacionnan a cuminsa na ATCO Barcadera p’e evento grandi aki. Tur empleado a pasa busca nan Ham pa asina prepar’e pa Pasco.
Empleadonan hunto cu nan famia a yega pa pasa un rato ameno. E evento a cuminsa atardi despues di trabou y a sigui te den oranan di anochi. MetaCorp a prepara tentnan di coy come y coy bebe pa tur empleado y nan famia.
Tur empleado a pasa busca nan ham cerca e respectivo compania, esta ATCO Concrete, ATCO Aruba, Brouwerij Nacional Balashi, Tropical Bottling Company, EcoTech, The New York Laundry, The Cinemas, EcoGas y e oficina di MetaCorp mes. E team dinamico di ATCO a mustra nan creatividad trahando un kerstboom di concrete.
Grupo di Betico a anima e atardi cu nan canticanan, mientras Metropolis tambe tabata pone ambiente. E muchanan tambe a disfruta di evento hungando den e dino jump.
CEO di MetaCorp, Eddie de Veer, a indica cu fin di aña ta yegando y esaki ta e temporada cu e 450 empleadonan di tur nan companianan subsidiario ta ricibi nan ham di Pasco. Tambe el a expresa cu su persona hunto cu Robert Carrasquero y Guus Slabbekoorn tabata e chefnan riba grill durante e evento, nan a traha y empleadonan por gosa di e evento. A prepara un dushi pan cu hotdog, mientras managernan di diferente departamento tabata sirbi e bebidanan.
El a indica cu ainda tin algun evento mas manera tiramento di pagara y fiesta di compania, pa asina celebra cu e empleadonan un otro aña di trabou, progreso y exito!