Home Politics Minister di Turismo, Salubridad y Deporte Dangui Oduber a reuni cu e...

Minister di Turismo, Salubridad y Deporte Dangui Oduber a reuni cu e Asociacion di Specialista Hospital Aruba ASHA

SHARE

Gobierno lo ofrece e nivel di cuido mas halto pa nos pais

Diabierna merdia Minister di Turismo, Salubridad y Deporte, Dangui Oduber, hunto cu Prome Minister Sra. Evelyn Wever-Croes y Dr. Gerrit Croes a tene un reunion cu e Asociacion di Specialista Hospital Aruba ASHA.

E reunion aki a bay den un hopi bon esfera caminda e specialistanan a trece varios punto di preocupacion dilanti. Nan a expresa e deseo pa traha hunto cu e Minister di Turismo, Salubridad y Deporte pa mehora e cuido medico na Aruba.

Den e reunion aki palabra diferente puntonan di accion pa asina trata na mehora e cuido medico. Entre otro a trata e punto di e escases di cantidad di specialistanan na Aruba cua ta un preocupacion hopi grandi di e asociacion cu a pidi pa gobierno duna atencion na esaki cu urgencia.

E asociacion kier bin cu un registro central pa studiantenan. Asina aki por sa exactamente cuanto studiante tin, den ki ramo di specialisacion nan ta studiando y ki tempo nan lo termina nan estudio. Esaki lo yuda tambe pa ora cu e studiantenan caba, por sa cua vacatura tin habri pa nan traha aki.

Un otro tema cu a wordo discuti ta e BIG registratie y certificacion y bijschooling. Na momento cu un specialista ta trahando na Hospital ta importante pa tur aña nan haya un certificado di bijschooling y naschooling pa asina nan keda altanto di pratica.

Un otro palabracion importante entre e Asociacion y e Minister ta cu lo bay tin reunionnan na base regular pa keda informa di tur desaroyonan cu lo bay tin den cuido medico.

Minister di Turismo, Salubridad y Deporte a sigura e Asociacion cu salubridad ta hopi halto riba agenda di Gobierno y cu Gabinete Wever-Croes lo focus riba prevencion riba cua e Asociacion a keda hopi contento di tende.

Pa Gobierno di Aruba tabata hopi importante pa sinta scucha e grupo di specialista aki pa asina pone nan na haltura kico tur nan por spera di e Gobierno aki riba e tereno di salubridad cu lo ta pa percura pa ofrece e nivel di cuido mas halto pa nos pais.