Pa su dedicacion y trabounan excelente cu e ta haci pa nos pais
Diabierna mainta Prome Minister Evelyn Wever-Croes a ricibi e grato bishita di sra. Louella Brezovar van Veen. Pa sra. Brazovar van Veen, e motibo di su bishita no tabata conoci y a keda sorpresa ora cu Prome Minister a notific’e cu el a wordo invita pa asina Gobierno di Aruba honr’e cu un bunita reconocimento.
Sra. Louella tin un historia den su carera profesional hopi impresionante. El a gradua na “The Hotel School” na Den Haag Hulanda y despues di esey a sigui mas di 25 aña di experencia den hospitalidad internacional, trahando cu diferente cadenanan hotelero di mas grandi internacionalmente. Actualemente Sra. Louella ta General Manager di Ritz-Carlton Aruba.
Recientemente e revista NEXOS reconoci internacionalmente a dedica un articulo riba Sra. Louella cu e titulo “E suerte ta un dama” dunando un descripcion di e trabou di Sra Louella na e Casino di Ritz-Carlton.
Sra. Louella Brazovar van Veen ta un yiu di tera, un hende muher cu ta haci trabounan excelente pa contribui grandemente na nos pais.
Prome Minister sra. Evelyn Wever-Croes a gradici Sra. Louella pa tur locual cu el a haci pa promove Aruba riba tereno internacional y pa su dedicacion y coolaboracion na nos turismo. Y a entrega sra. Louella den nomber di Gabinete Wever-Croes un bunita ramo di flor y un plakaat pa reconoce un “Hende Muher di Excelencia”.