Home » Minister di Finansas, Economia y Cultura Sra.Ruiz-Maduro: “LEY PA INTERCAMBIA Y DUNA ASISTENCIA FISCAL CU OTRO PAISNAN!”

Minister di Finansas, Economia y Cultura Sra.Ruiz-Maduro: “LEY PA INTERCAMBIA Y DUNA ASISTENCIA FISCAL CU OTRO PAISNAN!”

by Admin
0 comment 44 views

E ley a wordo aproba unanimamente

ORANJESTAD – Dialuna mainta Minister di Finanzas, Economia y Cultural Sra. mr. Xiomara Ruiz-Maduro tabata den sala di Parlamento pa su prome reunion publico cu Parlamento di Aruba. Riba agenda tabata tin pa trata e ley “Bepalingen Internationale Bijstandsverlening bij Internationale Belastingaangelegenheden”.
Ta trata aki di un ley pa asina por intercambia di informacion fiscal na un manera automatisa cu otro institucionnan na otro pais y asina nos pais por ricibi su parti husto tambe pa locual ta trata asunto fiscal.

Dia 29 di october 2014 Aruba a firma e Tratado Multilateral pa intercambio di informacion financiero automatico di institucionnan financiero cu autoridadnan di impuesto na e pais cu e institucion financiero ta estableci.

Pais Aruba a compromete cu mas tarda na september 2018 lo ta cla pa por intercambia di datonan financiero di 2017. Esaki ta nifica cu institucionnan financiero mester colecta e datonan financiero di e clientenan di exterior pa aña 2017 y suministra esakinan den curso di 2018 na Departamento di Impuesto, cual ultimo na su turno mester entrega e datonan aki na e paisnan miembro.

Pa por logra esaki e siguiente pasonan mester wordo tuma:
1. E base legal necesario mester ta regla pa por colecta y suministra e datonan financiero;
2. Banda di esaki mester tin un sistema caminda ta haci posibel cu institucionnan financiero por suministra e datonan financiero na Departamento di Impuesto cual na su turno mester ta den capacidad pa sigui suministra esaki. E sistema aki a wordo desaroyo na Corsow y Aruba lo wordo tuma over tambe pa Aruba. E medionan financiero a wordo aproba y e Departamento di Impuesto ta ocupando na implementa esaki.
3. Pa evita cu nos pais por bay riba e lista preto, ta di sumo importancia cu Aruba ta wordo certifica como un pais cu ta confiabel pa intercambia informacion. Aruba mester cumpli cu e rekesitonan y si Aruba no cumpli na tempo, Aruba lo mester suministra e informacion pero lo no por ricibi informacion di otro pais y/o institucion.

E mandatario a trece dilanti cu envez di haci cambio den e ALB, esta haci cambio den e Ley General di Belasting a scoge pa bini cu un ley apart pa regla e intercambio di informacion fiscal y pone e condicionnan pa locual e asistencia y intercambio mester tuma luga na nivel internacional. Esaki ta tambe pa crea suficiente posibilidad pa ta flexibel, pa asina por ta eficiente na momento cu desaroyonan nobo presenta y cambionan mester por wordo haci na tempo sin cu tin mester tin tardanza innecesario den esaki.

Fraccionnan den Parlamento tur ta sostene e ley aki y no tabata tin pregunta pa Minister Ruiz-Maduro. Cu aprobacion di e ley aki pais Aruba legalmente ta prepara tambe pa por cumpli cu Tratado Internacional corespondiente. Minister Ruiz-Maduro a gradici tur e profesionalnan y di e departamento legal cu a contribui den e ley aki y e fraccionan den Parlamento cu a aproba e ley aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio