Minister mr. Xiomara Ruiz-Maduro a presenta e realidad di finansas publico
Gobierno di AVP a laga como herencia un deficit extra di casi 330 miyon pa 2017 y 2018
ORANJESTAD – Dialuna mainta durante e conferencia di prensa di Gobierno di Aruba, Minister di Finansas, Economia y Cultura a hiba palabra. E mandatario a indica cu despues di dos siman e por presenta e situacion real di finansas publico cu e gobierno anterior a laga atras. Gabinete Wever-Croes su punto di salida ta mustra e realidad.
Presupuesto Supletorio 2017
Minister Ruiz-Maduro a trece dilanti cu pa locual ta e Presupuesto 2017, e gobierno anterior a entrega e Presupuesto Supletorio cu ta mustra un deficit di 0 florin, pero e informacion cu gobierno tin ta cu esaki no ta cuadra cu realidad. E gobierno nobo ultimo dos simannan a haci un analisis di e situacion di nos finansas publico y esaki a duna como resultado cu tin un deficit extra di 130 miyon florin pa 2017. Esta cu falta e suma aki extra banda di e 25 miyon di deficit den Presupuesto 2017. E 130 miyon extra aki di deficit ta debi na entradanan cu a keda atras cu e gobierno anterior a presupuesta y cu no a wordo ricibi, 50 miyon di winstbelasting, 7 miyon di invoerrechten y 73 miyon di Refineria di Aruba. E ultimo aki a papia cu banco y ta mustra cu lo no bay ricibi esaki. Mirando esaki e mandatario a trece dilanti cu gobierno di Aruba lo haci cambio y lo presenta un nota di cambio pa e Presupuesto Supletorio 2017 pa presenta e realidad financiero di nos pais. E realidad caminda bo ta waak cu tin un deficit mas grandi cual ta cuadra tambe cu e ultimo carta di CAFT cu ta mustra un deficit di riba 2,4%. Recapitulando esaki ta trece nos na e realidad cu 2017 ta sera cu un deficit di 155 miyon florin.
Presupuesto 2018
Pa locual ta pa 2018, e Presupuesto no a wordo entrega na tempo manera ley ta stipula, esta cu e mester wordo entrega no mas tarda cu 1 di september 2017. Aki tambe gobierno nobo despues di a reuni cu instancianan y a haci un analisis cual ta mustra cu te na e momento aki e presupuesto pa e proximo aña lo tin un deficit di 195 miyon. Lo no keda cla pa trata presupuesto 2018 prome cu fin di e aña aki y gobierno anterior sabiendo cu mester financia un suma grandi na inicio di 2018 pa paga debe, a prepara un ley apart di financiamento na un suma di 338 miyon pa asina por busca e fondonan necesario aki. E ley aki gobierno di Aruba lo bay sigui cu ne pasobra no ta mira cu lo por pasa e Presupuesto 2018 e aña aki ainda y tin debenan cu mester wordo paga na inicio di 2018. Ademas mester bay adapta e presupuesto 2018 na e reparticion di cartera di e gobierno nobo. Como tambe mester presenta e situacion financiero real di nos finansas publico cual ta un deficit di 195 miyon. Esaki ta totalmente contrario na e palabracion den ley di LAFT cu e gobierno anterior (AVP) tabata tin, cu lo tin un surplus di 25 miyon florin na 2018.
Revision di rating
Nos pueblo mester ta conciente cu mal maneho di e gobierno anterior (AVP) tin su consecuencia pa nos pais. Cu un situacion financiero no saludabel institutonan internacional lo por revisa e rating financiero di nos pais. Ademas esaki lo por conduci tambe cu pa haya fiansa esaki lo por ta na un interes mas halto. Minister Ruiz-Maduro a sigui trece dilanti cu ta mas cu cla cu Aruba lo no por cumpli cu e ley di LAFT, ni pa aña 2017 y tampoco 2018. Pa aña 2018 mester pone e extra deficit di 2017 di 130 miyon cu e 195 miyon extra deficit compara cu e presupuesto 2018 di gobierno anterior, esaki lo suma un total di casi 330 miyon cu lo bay tin mester pa cumpli cu e ley di LAFT.
Realidad
E gobierno anterior (AVP) a hiba un maneho di añanan largo di no trece e situacion financiero di nos pais manera mester ta. Semper tabata conoci cu gobierno anterior tabata tapa debe structural cu entradanan incidental. Realidad financiero no ta cos di haci wega segun Minister Ruiz-Maduro. Ta e momento pa pueblo di Aruba realiza cu esaki ta e herencia di gabinete Mike Eman. Di otro banda esaki ta e reto cu nos pais Aruba tin su dilanti. Nos pais tin supervision financiero, nos finansas publico mester un cambio y no por sigui asina. Como gobierno bo mester tuma decision, aunke cu bo lo no kier, pero bo mester ta responsabel y transparente. Pueblo mester sa kico ta e realidad awor y cu e gobierno nobo ta traha pa reduci e deficit y traha caminda pa nos yega na un finansas publico manehabel y sostenibel riba termino largo.