Home » Ocando “Candi” Wernet a marca historia den nos futbol

Ocando “Candi” Wernet a marca historia den nos futbol

by Admin
0 comment 63 views

Fundacion Lotto pa Deporte a reconoce recientemente como un baluarte di SV Estrella
Dia 16 di September 1958 el a score 6 gol den un solo wega contra La fama

ORANJESTAD, Aruba – Recientemente Fundacion Lotto pa Deporte a honra varios baluarte di SV Estrella. Un di nan sin duda tabata Ocando “Candi” Wernet, cu a cuminsa su carera den futbol desde aña 1952. Den cuadro di aporta y sostene deporte, e fundacion a para un rato na e rol di SV Estrella den nos historia di futbol, a percura pa verf e edificio y a entrega un reconocimento na 5 baluarte di e team.

Ocando “Candi” Wernet a cuminsa su carera futbolistico na 1952 hungando p’e team di Junioren di Estrella. Den e team aki el a hunga 3 aña y a titula 2 biaha campeon di Junioren. Na 1955 el a pasa p’e team di Hoofdklasse (Division Honor). E aña aki Candi Wernet tambe tabata un di esunnan selecciona p’e dos weganan cu Aruba a hunga contra Haiti. For di 1958 te cu 1973 el a hunga pa Estrella den Division Honor.

Dia 16 di september 1958 Candi Wernet a impone un record nobo pa nos futbol di Division Honor ora cu den e ultimo wega el a score 6 gol contra La Fama y asina bira e maximo goleado cu 10 gol. A dura mas cu cuarenta aña prome cu a surpasa e record. Durante e periodo cu el a hunga pa Estrella den Division Honor, el a anota 48 gol y na 1968 prome cu e campeonato a cuminsa el a bira capitan.

Durante su carera cu Estrella el a titula 7 biaha subcampeon (1690, 1961, 1965/66, 1967/68, 1969/70, 1970/71, 1971/72) y 2 biaha campeon di Aruba (1968/69, 1973). Cu Estrella Candi Wernet a participa den 7 Copa Antiano y a titula subcampeon na 1968 y 1969 y campeon na 1970. Cu su team Estrella, Candi Wernet a hunga contra varios team stranhero riba nos isla e.o. Robin Hood, Leo Victor y Transvaal di Surnam, Deportivo Portugues (2x) y Zulia FC di Venezuela, Alajuelense y Seleccion di Costa Rica, Don Bosco di Puerto Rico, FC Remo di Brasil, Magallanes di Chile, Xerxes di Hulanda y Deportivo Mexico di Costa Rica. For di 1968 te ora cu el a retira na 1973, Candi Wernet tabata e capitan di Estrella.

Na aña 1958 el a debuta den e seleccion local contra Corsou y despues durante tur aña cu a sigui mas weganan contra Surnam, Haiti y Boneiro. Tambe contra clubnan stranhero cu a bishita nos isla manera Austria FC, Montreal Ukes, America FC di Brasil y e famoso Arsenal di Inglatera. Na 1971 el a hunga su ultimo wega p’e seleccion di Aruba.

Na aña 1960 Candi Wernet a debuta den e seleccion di Antias Hulandes, forma pa 17 hungado di Aruba y 3 di Corsou cu a participa na Habana, Cuba den e di nuebe campeonato di futbol di Centro America y di Caribe. Antias a keda na di dos luga cu e medaya di plata despues di a perde e wega di desempate contra Costa Rica. Na 1962 Candi Wernet a hunga pa Antias na Jamaica den e Weganan Centro Americano y di Caribe. Aki e seleccion a Antiano a gana e medaya di oro despues cu nan a gana Mexico cu score di 3-0. P’e bon presentacion di Candi Wernet na Jamaica, despues cu el a regresa Aruba, a scoge pa forma parti di e otro seleccion di Antias cu a bishita Hulanda y Dinamarca.

Na 1963 Candi Wernet a haci tres biahe cu e seleccion Antiano. E prome tabata na Jamaica pa hunga den un torneo entre Antias, Haiti y Jamaica. Aki Antias a keda como campeon di e torneo. E di dos tabata na El Salvador pa hunga den e campeonato di CONCACAF, unda Antias a keda na di tres luga y e di tres tabata na Surinam pa hunga un wega eliminatorio p’e Olimpiada di Tokyo na 1964.

Na 1965 Candi Wernet a forma parti tambe di e seleccion di Antias cu a termina na di cinco luga den e Campeonato di CONCACAF na Guatemala. Na 1966 a tuma luga na Puerto Rico e weganan Centro Americano y di Caribe y aki Candi Wernet a gana medaya di plata pa Antias cu a keda na di dos luga despues di a perde 2-1 cu Mexico cu a gana e medaya di oro. E seleccion aki tabata forma pa 20 hungado di Aruba y 1 di Boneiro.

Na 1968 Candi Wernet a forma parti di e seleccion di Antias cu a hunga e weganan eliminatorio p’e mundial di Mexico 1970 contra Surnam y El Salvador. Despues cu Antias a perde un wega contra Surinam y dos na San Salvador el a keda elimina.

Como campeon Antiano, Estrella a haya e derecho pa participa den e “Campeonato de Campeones” di CONCACAF na Guatemala na 1972 y Candi Wernet tambe a haci e biahe. Aki Estrella a hunga contra Comunicaciones di Guatemala, Alajuelense di Costa Rica, Rochester Lancers di Merca, Cruz Azul di Mexico y Transvaal di Surinam.

Na final di October 1973 den un wega special di Estrella, kende e aña ey tabata campeon di Aruba, hungando contra La Fama, campeon di A-klasse, Candi Wernet a tuma retiro for di nos futbol.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio