EcoTech contribuyendo na reciclahe
ORANJESTAD, Aruba – Diasabra 25 di November EcoTech tabatin su Inzamel Actie, unda cu comunidad a hiba materialnan cu nan no mester mas di dje. E Inzamel Actie a cuminsa desde 9:00am te 2:00pm na ATCO Dakota y hopi persona a haci uzo di e oportunidad aki.
Tur persona cu a yega a topa e team dinamico di EcoTech riba e parkeerplaats di ATCO Dakota, kendenan tabata guia tur hende unda pa bay y den cua baki nan mester a pone e materialnan. E materialnan cu por a hiba e dia aki tabata hero, aluminium, bateria di cas/bateria di auto, frishider, stoof, carton, papel/corant/revista, articulo electronico manera computer, television, celular, azeta di motor/azeta di cushina, palet. Despues cu e Inzamel Actie a termina, a cuminsa prepara pa hiba tur material na EcoGas.
Julio Wever, sales & marketing di EcoTech, a expresa cu e Inzamel Actie a bay bon. Nan a pone bakinan separa pa cada material y a haci esaki mas facil, pero tambe na un manera mas responsabel cu EcoTech ta contribui na reciclahe. “Hendenan a bisa cu no mester di baki bashi grandi, pero por a bin direct aki na ATCO Dakota pa deshaci di nan material”, el a indica.
Manera con cos tabata bayendo, EcoTech tin mira pa futuro kico nan ta bay haci y nan kier ripiti e Inzamel Actie. Ya caba ta papiando con lo haci esaki, asina Julio Wever a indica. E evento di Inzamel Actie tabata te cu 2:00pm unda empleadonan di EcoTech a yuda pueblo na momento cu a trece e materialnan separa pa deshaci di esakinan.