GOBIERNO DI ARUBA
ORANJESTAD: Un dia tristo sigur pa famia y henter e comunidad di Aruba ora cu hiba e dos criaturanan aki na nan ultimo lugar di sosiego. Un dia cu tur hende por reflexiona riba e caso lamentabel aki na trabou, na scol y den famia.
Gobierno di Aruba a decreta e dia aki como un dia nacional di luto pa asina e dia aki y e sacrificio di dos bida inocente nunca mas wordo lubida y bay envano.
Prome Minister Evelyn Wever-Croes ta haci un apelacion pa tur departamento di Gobierno durante oranan di trabou hisa nan bandera di Aruba halfsok pa asina den cada departamento sinti e astmosfera di luto pa e dolor cu e sucedido aki a laga atras. Un apelacion tambe pa sector priva haci esaki.
Tambe Prome Minister ta haci un apelacion pa tur scol dedica e dia aki pa trata e tema di abuso di mucha pa asina tur e hobennan cu ta bayendo scol nunca lubida e storia doloroso aki. Y pa tur nos muchanan y hobennan cu ta pasando den un situacion similar sinti cu tin hende cu tin oido na nan dolor y cu ta cla pa yuda nan. Y especialmente, pa nan sa cu biba den abuso no ta algo normal. Y cu nan por tin e confiansa cu ora nan wordo abusa, nan por haya e curashi y papia sin miedo di nada.