Amsterdam, Hulanda: Den un articulo di e website di NOS.nl, publica awe 27 di November, relaciona cu e caso tristo di e criatura di 5 aña cu a fayece y su ruman di 3 aña cu ta perdi, e website aki a menciona den nan articulo cu casonan di abuso di mucha na Aruba ta hopi alarmante.
Tambe den e articulo nan a publica informacionnan cu nan ta dispone di dje y haya for di Aruba Task Force pa derechonan di mucha. Segun e articulo, Sacha Geerman di Aruba Task Force a pone por escrito, cu e cifranan mas recien cu nan ta disponi di dje ta cu, un riba cada 15 mucha na Aruba tin di haber, cu un of otro forma di abuso di mucha, sea violencia domestico, abuso sexual, maltrato of negligencia. Esaki ta un calculacion y ta wordo bisa cu ainda e lo por ta hopi mas, mirando cu no tin un caminda directo pa meld abuso di mucha.
E Psikiatra Rita Zecher – Enahoro a bisa cu dokternan di mucha kier actua referente e problema aki, pero tin miedo di entrega keho, pa represaya y tambe nan por wordo deteni pa motibo di a saca secreto medico di pashent.
Zecher – Enahoro a bandona Aruba algun aña pasa despues segun su persona ela wordo menasa y ela skirbi un buki referente abuso di mucha na Aruba.
Den e articulo nan ta menciona nomber di Sra. Enid De Kort, kende ta un gezinstherapeut cu ta mira hopi miseria di cerca. Aruba ta poni como e di dos pais den e dieznan di mundo caminda tin mas divorcio ta tumando lugar.
Segun e articulo aki, Sra. De Kort a contanan cu nos na Aruba no conoce un famia tradicional, hopi biaha tatanan no ta envolvi den educacion di nan yiunan. Mamanan tin dos of tres trabou pa mantene cabes riba awa y no tin tempo pa nan yiunan y e wela tambe tin cu traha.
E ta mira den hopi famia cu ruman grandi tin cu wak pa ruman chikito y asina nan crece nan ta sali na estado hopi liher. Tambe cu e mucha hombernan hopi ta dropout di scol hopi trempan, segun e informacionann cu nan a ricibi, cu 44 porciento di e hobennan na Aruba ta sin trabou.
Segun e articulo Sra. De Kort a informanan cu tur siman tin un of mas caso di crisis di famia ta drenta. Mas o menos 25 caso cu ta wordo gemeld tur luna. Maske cu tin tur e casonan aki andando, ainda no ta existi cooperacion estrecho entre e partnersnan den hulpverlening.
E caso di e dos rumanan, segun e articulo De Kort a bisa cu esaki ta un señal hopi grandi y ta spera cu awor Si Aruba lo duna e problema aki su debido atencion.