Diadomingo atardi a sali un comunicado di prensa, den cual Ministro di Educacion, Armando Lampe ta informa cu den un reunion di urgencia teni diasabra 25 di November, cu ela propone y a wordo aproba, cu dialuna 27 di november pa 10’or di mainta tur scol lo mester tene un minuut di silencio pa recorda Rishandroh Anastacia cu a perde su bida despues di maltrato severo. E momento di reflexion aki ta pa bisa no na abuso di mucha.
Esaki enberdad a wordo haci na tur scol, muchanan por a tene den klas of tur hunto riba e plenchi di scol.
Arubanative.com a scoge pa bishita dos scol na Paradera, cual ta Colegio Pastoor Kranwinkel y Maria Goretti College, ambos scol a scoge pa sali pafo y riba e plenchi di scol, nan a haci un bunita oracion pa descanso di e alma di e criatura Rishandroh Anastacia. Tabata un momento hopi emocional pa mira tur e muchanan inocente hunto y resando cu hopi fe pa un angelito cu no tey mas.