ORANJESTAD, Aruba: Na Aruba a tuma luga e di 9 conferencia di Dutch-Antillean- Surinam Clinic (DAS) di reumatologia y medicina interno, unda cu a conta cu presencia di dokter y internistanan orador di Corsou, Aruba, Hulanda, Colombia, Suriname y Sint Maarten. Esaki ta di 3 biaha cu ta organisa e conferencia aki na Aruba. A conta cu mas di 100 participante, kendenan pa 2 dia a ricibi diferente informacion entre otro a enfoca riba miho uzo di antibiotica.
Dr. Sandro Waterloo, Internist-eldery medicine Aruba, tabata un di esunnan cu a organisa e conferencia y el a duna di conoce cu a conta cu presencia di dokternan di cas, specialistanan, nursenan, hendenan di AZV y Inspeccion di Aruba. E conferencia tabata uno exitoso. E meta di e conferencia tabata pa specialistanan, dokternan di cas y tur otro esunnan cu tabata presente haya e oportunidad pa siña mas na e conferencia mes. E di dos meta di e conferencia tabata pa tur presente conoce otro, asina el a duna di conoce. “Henter dia bo ta den oficina ta mira pashent, pero hopi biaha no ta mira colega y ami como specialista na hospital no ta mira hopi dokter di cas”, asina dr. Waterloo a duna di conoce.
E conferencia aki a duna su persona e oportunidad pa mira otro dokter y conoce nan mas miho. Durante e conferencia nan a haya oportunidad di intercambia informacion cu otro, haciendo esaki nan ta keda na altura di tur loke tin ultimamente ariba tereno medico. Y discutiendo un par di caso tambe ta yuda tur na yega pa compronde cierto aspectonan mas ainda.
Dr. Jaclyn de Kort, Internista specialisa den infeccion, tabata un orador na e conferencia y el a duna di conoce cu nan a lanta nan grupo di antibiotica cual ta un programa mundial. A lanta e grupo aki pa asina por vigila e uzo di antibiotica y pa asina tur dokter ta mas consciente, principalmente den hospital, pero tambe pafo di hospital. El a sigui duna di conoce cu antibiotica ta remedinan duna na pashent contra infeccionnan, causa pa micro organismo y no causa virus. Un persona cu por tin griep no mester haya un antibiotica. E problema cu nan ta hayando mundialmente, ta cu e bacterianan ta birando resistente p’e antibiotica convencional.
Esaki ta nifica cu aki par di aña un “simpel” blaasontsteking, esta un infeccion di orina por bira fatal. Esey lo haci cu un operacion di un heup of kimoterapia tambe ta bira dificil, pasobra mester di antibiotica pa ora di trata pashentnan na momento di un infeccion. “Nos tin cu percura cu nos por mantene cual nos tin aworaki den uzo”, asina el a duna di conoce.
Mester ta mas consciente pa ora uza antibiotica. Tin reglanan cu ta importante di cual mester tene cuenta na dje.
- No cumpra antibiotica unda cu ta, uz’e solamente si dokter di cas duna recept y pues tin un bon indicacion cu e pashent mester hay’e.
- Zorg pa uza e antibiotica totalmente. Zorg pa caba cu e tratamento completamente.
- Si bo tin tablet di antibiotica cu a resta, no duna bo bisiña p’e haci uzo di dje.
Dr. de Kort ta kere cu asina aki por preveni e mal uzo di antibiotica. Tur antibiotica ta of por causa resistencia y e ta keda na e persona mes pa uz’e mas prudente posibel.
E grupo di dokter cu ta controla e uzo di antibiotica ta duna guia na dokternan di cas con por prescribi antibiotica prudente uzando bon indicacion. Por haci uzo di e website http://aruba.swabid.nl, unda cu por haya e guia di antibiotica digitalisa y e ta sostenibel y tur empleado di cuido di salud por haci uzo di esaki.