Home Local Den cuadro di e “Digicel 2030 Global Transformation” Digicel Aruba ta actualisando...

Den cuadro di e “Digicel 2030 Global Transformation” Digicel Aruba ta actualisando tur su cellsitenan

SHARE

Lamentablemente e baymento di coriente a percura pa basta reto

ORANJESTAD, Aruba: Algun luna pasa Digicel, na nivel mundial, a start cu un programa cu a haya e nomber di “Digicel 2030 Global Transformation”, den cual ta pone e cliente den control y ta actualisa nan red den uno super lihe, moderno y eficiente. Den e proceso a cera un “partnership” cu e compania di sistema di telecomunicacion “ZTE” den cual ta conduci un programa pa sigui actualisa e rednan di Digicel den forma continuo.

Aki na Aruba tambe e ekipo tecnico di Digicel a cuminsa cu e trabounan necesario pa haci cambio na e red existente, pa asina por cumpli cu e demanda nan di e programa di “Digicel 2030”. Den esey a start for di November 2016 cu actualisacion di mas di 40 cellsite situa strategicamente tur rond di nos isla, pa garantisa un miho servicio.

Lamentablemente den e proceso di actualisacion di e red, e cambionan lo por causa interupcionnan, cu consecuencia cu data por cay afo, yamadanan y internet. Ta haci tur posibel pa limita e inconveniencia aki na clientenan di Digicel Aruba. E compania ta sigura cu e “upgrade” ta hopi necesario, pa hiba e red na e siguiente nivel, pa usuarionan por haya un miho experencia riba e red nobo.

Ayera, lamentablemente durante e retonan na WEB cu a causa cu coriente a bay, cu Digicel tambe a confronta problemanan den su red. Tecniconan mester a stop cu e trabounan di actualisacion, pa atende cu e daño causa na nan red door di e caida abrupto di coriente den varios area, entre otro na nan central. E retonan ey a sigui awe ainda, pa cual ta solucionando nan un pa un.

Digicel Aruba ta consciente di e inconveniencia aki, pa cual ta haciendo tur posibel pa termina e trabou mas lihe, pero ta haciendo esaki bon. Lo sigui informa clientenan di tur desaroyo relaciona cu e trabounan pa actualisa e red, e cellsitenan y e central di e compania di comunicacion mobil cu mas ta creciendo den Caribe, Centro America y Oceano Pacifico.