Entrada pa camber di hotel (RevPar) a aumenta cu 17.4%
ORANJESTAD – E total di turismo ‘stay-over’ pa nos isla a aumenta cu 6.5% si compara esaki cu october 2016. Si exclui e bishitantenan di Venezuela, por mira un aumento di 10.8% cual ta igual na un total di 74.350 bishitante pa nos isla. E cifranan ta indica crecemento den mercadonan clave pa Aruba, manera Merca, Brazil, Argentina, Reinonan Uni y Alemania.
Pa e asina yama year-to-date 2017, 878.940 turista a bishita nos isla, cual ta 5.1% menos cu e mesun temporada aña pasa. Si nos exclui e bishitantenan Venezolano, por mira un aumento di 8.1%, ekivalente na 800.794 bishitante.
Turismo ‘stay-over’
Aruba ta wordo representa den tres diferente continente. Compara cu october aña pasa, pa 2017 e turismo procedente for di e continente Norte Americano a aumenta cu 13.5% y ta trece 66.3% di total di turismo pa nos destinacion. Na october, Merca a aumenta cu 13.5% y Canada cu 13.4%. Pa e prome 10 luna di 2017, e continente aki a subi cu 9.7% pa turismo pa Aruba.
Continente Latino Americano a baha cu 8% di cual Venezuela a baha cu 24.2% compara cu october aña pasa. Brazil a subi cu 29.8% y Argentina a subi cu 30.5%. E continente di Latino America ta trece 19% di e total di turismo pa luna di october na nos isla. Pa e prome 10 luna di 2017, turismo procedente di Latino America a baha cu 36.8% primordialmente mara na caida for di Venezuela.
Pa loke ta Europa por nota cu turismo a aumenta cu 4.1% compara cu e mesun luna aña pasa. Hulanda a baha cu 2%, y Alemania a aumenta cu 21.2%. E continente Europeo ta representa 10.6% di turismo pa Aruba pa luna di october.
Pa e prome 10 luna, Europa a trece 8.6% turista mas pa Aruba compara cu e mesun temporada na 2016.
Turismo crucero
Durante october 2017, 52.298 pasaheronan crucero a bishita nos destinacion riba un total di 25 diferente barconan crucero. Compara cu luna di october aña pasa, turismo crucero a crece cu 36.4% (october 2016 Aruba a haya 38.349 bishitante for di 17 crucero). En total pa e prome 10 luna di 2017, Aruba a ricibi 589.367 pasaheronan crucero for 250 diferente barco. Esaki ta ekivalente na un aumento di 23.4% pasahero adicional pa nos isla (28 barco crucero mas) compara cu e mesun temporada aña pasa.
Ademas di e cifranan aki, ta bon pa menciona cu na october e temporada ‘high-season’ a inicia cual lo sigui te na april 2018.
Tourism Receipts / Central Bank of Aruba
Di acuerdo cu Banco Central e asina yama ‘Tourism Receipts’, pa cu e prome tres luna (Q1) di 2017, a contribui cu AWG 872.5 miyon den nos economia, cual ta un aumento di 3.5% compara cu e mesun temporada na 2016.
Hotelnan / AHATA
Segun Aruba Hotel and Tourism Association pa e luna di october, e ‘Average Daily Rate’ (ADR) a aumenta cu 8.4% compara cu 2016. Esaki den cifra ta US$ 174.53 na 2016 compara cu US$ 189.20 pa 2017. Pa e ‘Year-to-Date’ esaki a resulta den un aumento di 4% di US$ 223.67 na 2016 pa US$ 232.53 den 2017. E entrada pa camber disponibel, e asina yama RevPAR a aumenta cu 17.4% di US$ 136.48 na 2016 pa US$ 160.22 na 2017. Pa e prome 10 lunanan di 2017 esaki a aumenta cu 9.8%, na 2016 e tawata US$ 179.06 y pa e mesun temporada den 2017 el a subi pa US$ 196.60 E anochinan ocupa (ORN) pa camber a aumenta cu 9.5% pa october 2017 y pa e ‘Year-to-Date’ 2017 el a aumenta pa 6.8%. Gran parti di e aumento aki ta debi cu Tropicana Resort a habri cu 53 camber adicional fin di december 2016.
E cifranan di AHATA ta basa riba 14 propiedadnan incluyendo mayoria di tur e hotelnan cu excepcion di Hilton Aruba.