Home Local Pashent cu enfermedad cronico corda acudi prome na dokter di cas ...

Pashent cu enfermedad cronico corda acudi prome na dokter di cas Emergency Department awo situa den New Bed Tower

SHARE

ORANJESTAD, Aruba: Dia 31 di October 2017 Dr. Horacio E. Oduber Hospital a drenta den un era nobo, unda cu a muda di e edificio actual p’e New Bed Tower. Manager di Departamento di comunicacion, Charlaine Alexander-Huntington a duna di conoce cu diferente departamento ya ta den e edificio nobo y a hyega e turno di departamento di emergencia, esta  Emergency Department (ED) antes conoci como Spoed Eisende Hulp of Eerst Hulp. Diadomingo marduga a muda ED pa nan localidad nobo, unda cu mas o menos 40 miembro di personal ta sirbi un promedio pa aña di 35 mil pashent cu ta bishita Hospital su departamento di emergencia.

 

E departamento di emergencia tin 2 sala di espera amplio, cual 1 tin un espacio special pa mucha y aki nan por entretene nan mes durante e tempo di espera. Pa yega Departamento di emergencia nobo ta pasa e edificio actual di Hospital y ta sigui core y ta mira na man robes e New Bed Tower. Eynan ta drenta e parkeo y lo tin miembro di siguridad pa asina duna guia pa e entrada principal di Departamento di emergencia.

 

Coordinador Medico di Departamento di emergencia, Dr. Deepu Daryanani a duna di conoce cu a muda e departamento di emergencia unda cu ta trece algun cambio cune. Loke cu a cambia ta cu e facilidad lo ta uno ultramoderno y mas amplio cu prome. Dr. Daryanani a duna di conoce cu nan a bay di 7 camber pa 9 camber, pero tin e capacidad cu pa futuro lo por bay te cu 16 camber. Pa awo ta wardando pa haya e cantidad di personal y asina den futuro por habri e departamento di emergencia completo. Tin cambio special pa trata pashent cu ta yega cu mester di un trato cu tin di haber cu curason. Tambe den futuro lo tin un camber disponibel cu lo brinda den departamento di emergencia mes e facilidad di röntgen na momento di ta un emergencia.

 

E cantidad di camber a aumenta, pero cantidad di personal di cuido di departamento di emergencia no a cambia, pues ta pidi un y tur pasenshi na momento di yega departamento di emergencia, asina dr. Daryanani a duna di conoce. “Pashentnan cu  tin enfermedad cronico ta pidi pa nan bay nan dokter di cas prome cu nan bin departamento di emergencia”, asina dr. Daryanani a duna di conoce.

Tambe loke no a cambia ta e sistema di triage na momento cu un pashent yega hospital. Dr. Daryanani a duna di conoce cu e sistema aki ta a base di codigo di color, cu ta indica e color di e urgencia di un pashent y mas o menos con largo e lo tin cu  warda. Tambe ta importante pa corda cu ambulance ta drenta y pa esaki tin un porta apart pa nan, pues e no lo ta visibel pa pashentnan ora ambulance yega pasobra e porta aki ta uno separa. Pashentnan cu drenta via ambulance, lo trata nan prome pasobra nan ta casonan di emergencia.