Durante e conferencia di prensa na APA diaranson merdia, Formador sra Evelyn Wever-Croes a elabora riba e proceso di formacion cu a tuma un luna pa Gabinete Wever-Croes bira un realidad. Tocante e cantidad di ministernan cu ta forma parti di e Gabinete di Gobierno Nobo, sra Wever-Croes ta bisa lo siguiente:
“Nos a bay eleccion cu e compromiso di baha di 9 pa 7 minister y especialmente baha e cantidad di coordinadornan cu e proposito pa baha gasto di gobierno. Partido MEP a pidi e mandato cla pa esaki. Pueblo a pidi un coalicion, un coalicion di 3 partido.
Nos a haya e peticion pa bay e “extra mile” pa forma un base amplio di e tres partidonan MEP, POR y RED. No ta posibel pa tin un reparticion balancea si a keda na 7 minister. Nos a dicidi di bay na 8 minister, pero cu e condicion cu ta baha mes hopi gasto cu si ta na 7 minister nos a bay. Esaki nos lo haci door di baha e cantidad di persona cu ta bay traha pa e ministernan y cumpli toch pa baha e cantidad di gasto considerablemente di e forma aki.
Nos a bay ‘the extra mile’ pa logra e coalicion aki, y mirando e retonan grandisimo cu nos pais ta enfrenta, esaki ta e ekipo cu nos a forma pa atende cu e retonan aki. Nos ta bay cu 8 minister. MEP tin 5 minister. POR ta haya 2 minister y RED 1 minister.
E carteranan a wordo reparti mas husto posibel a base di resultado di eleccion”.
Sra Evelyn Wever-Croes a remarca cu especialmente pa MEP esaki tabata un procedura dificil, pasobra e carteranan di husticia, enseñansa, infrastructura y medio ambiente ta carteranan hopi importante pa nos. Pa motibo cu MEP tin candidatonan pa e carteranan aki.
“Pa tur cartera nos tin candidatonan capacita. Por ehempel sr. Rocco Tjon, cu tambe a pasa full e proceso di screening por si acaso nos a haya e cartera di husticia.
Pero nos a haya peticion pa haci un negosacion pa un coalicion, y den esaki bo ta haya algun cartera, y otronan bo no por haya. P’esey nos a haci palabracionnan den e programa di gobernacion cu ta contene e vision di cada partido”.
Sra Wever-Croes a conclui cu un disculpa pa e tardansa den e proceso di formacion.
“Tardansa a crea hopi espacio pa speculacion. Y riba dje nos a palabra un “media stilte” pasobra papia di e negosacion mientras nos ta negociando ta solamente stroba e proceso. Tur caminda na mundo ta usual cu tin “media stilte” durante negosacion pa coalicion.
Nos oponentenan tambe naturalmente a mira espacio pa crea hopi speculacion y confusion y awe nos por mira cu tur esey tabata rumornan falso. Y awe nos tin un base solido pa un coalicion manera cu pueblo a pidi”.