Home Politics MEP: Evelyn Wever-Croes Gabinete Wever-Croes ta un realidad

MEP: Evelyn Wever-Croes Gabinete Wever-Croes ta un realidad

SHARE

Diaranson pueblo a lanta cu expectative grandi cu e speransa cu Lider di MEP y Formador, Evelyn Wever-Croes lo anuncia cu Aruba tin un Gobierno Nobo. Den oranan di merdia pueblo a sinti e aire fresco di cambio ora cu Formador a manda e noticia cu a keda cla cu negosacionnan y cu Gabinete Wever Croes, consistiendo di MEP, POR y RED ta un realidad. Pa 2’or di merdia un conferencia di prensa a wordo yama na e edificio di APA na unda Sra Wever-Croes a bisa lo siguiente:

 

“Negosacionnan no a bay facil. Pueblo a pidi un coalicion, y cu e instruccion ey nos a bay traha pa wak si nos por yega na otro. Y no djis yega na otro, sino pa crea un base solido pa un coalicion stabil. Mi sa cu nos a test pasenshi di hopi hende, pero awor si nos ta asina leew. Nos ta tres partido cu a bay eleccion cu posicionnan propio y algun contradictorio na otro. Sinembargo nos a enfoca riba loke ta nos puntonan similar, no tanto loke ta dividi nos. E puntonan di prioridad cu a conduci na un gobierno di coalicion entre e tres partidonan ta:

 

  • Integridad y bon gobernacion, percura pa Aruba nunca mas pasa den escandalonan di corupcion
  • Baha gasto y maneha finansas responsabelmente
  • Pone e ser humano central: siguridad, enseñansa, cuido di salud, empleo, cuido social, desaroyo di economia y turismo, etc.

 

Nos a realisa cu esaki ta uni nos, y cu e puntonan cu ta uni nos ta hopi mas fuerte cu locual ta dividi nos. Nos a firma un acuerdo di formacion na Ayo dia 17 october 2017.

Nos a sigui negocia riba e diferente puntonan den programa pa sigura cu e vision di tur tres partido ta inclui den e programa di gobernacion cu nos a firma dia 1 di november na pia di Hooiberg. Eyden nos a haci palabracion con pa atende cu e puntonan cu ta dividi nos atrabes di un comision di consehero cu lo atende cu conflicto, pa asina garantisa e stabilidad di e gabinete. Unabes cu nos a keda cla cu esaki, nos a bay na e reparticion di cartera.

 

Na e ocacion aki Sra Wever-Croes a tuma e oportunidad pa gradici prensa presente pa e pasenshi cu nan a demostra durante henter e proceso di formacion duranta un luna y a duna tur espacio pa asina e trabou cana debidamente.