Principionan di bon gobernacion
Manera ta conoci Parlamento recien a aproba dos mocion den cual a dicidi pa e futuro Minister di Salubridad publico lo mester busca aprobacion di Parlamento pa gastonan adicional pa e proyecto di hospital, y alaves ora esaki ta e caso presenta un cuadro financiero relaciona cu gastonan adicional acompaña tambe cu conseho di Departamento di Finansas.
E motibo pakico a dicidi esaki ta pa establece principionan di integridad, transparencia y bon gobernacion. Pa democracia por funciona manera debe ser mester tin “checks and balances” cu ta funciona pa garantisa procesonan transparente.
Esaki ta e rumbo cu e Parlamento nobo aki lo encamina y den cuadro di esaki, como e organo di mas halto di nos pais, lo controla e gobierno nobo, na un forma independiente y imparcial.
Si tene na cuenta cu, segun e programa di gobernacion, lo bay traha riba leynan adicional pa elimina procesonan dudoso den gobernacion, Parlamento ta urgi cada minister pa tene esaki na cuenta caba ora di otorga proyectonan, prome cu e leynan aki keda cla.
Parlamento, atrabes di e mocion cu a wordo aproba, a manda un señal pa loke ta trata e caminda cu e lo bay encamina pa loke ta trata controla e gobierno cu ta bay asumi responsabilidad aki corto tempo. Mescos a exigi transparencia den e proyecto di hospital, lo exigi esaki tambe pa proyectonan den tur ministerio den futuro.
Transparencia den otorgamento di proyectonan
Si, por ehempel, elabora riba e area di husticia tin diferente proyecto nan cu lo mester bay wordo ehecuta. Nos Instituto Corecional Nacional mester haña un sistema di ICT pa asina nan por traha manera debe ser y alabes pa e instituto ta “compliant” cu reglanan internacional. Pero tambe mester bin un centro di detencion pa hobennan, pa asina por brinda miho guia y por eleva e chens cu nan ta integra exitosamente bek den comunidad.
Technologia lo mester wordo introduci pa asina eleva e producto cu ta wordo brinda actualmente den nos Instituto Nacional Corecional y door di nos Cuerpo Policial, pero esaki tambe ta necesario pa e siguridad di esnan cu ta labora den e organisacionnan aki. Siguridad na nos fronteranan lo nifica inverti den proyectonan manera un helicopter di polis, drones, radarnan y vehiculonan ekipa cu technologia moderno.
Y e fundeshi pa eleva e calidad di servicio y conocimento ta nos academia di husticia. Aki invercionnan mester wordo haci pa transforma nos “skol di polis” den un academia di husticia, adapta e structura existente di e organisacion pa asina por atrae e profecionalnan necesario y expande e cuponan di trabou, pa asina por brinda enseñansa di calidad halto na tur esnan cu ta labora den husticia y na nos partnernan den exterior.
Y ta pa e motibo aki e mocion cu a wordo pasa recien ta importante, pasobra e ta delinea e rumbo cu e parlamento aki lo encamina pa locual ta principionan di bon gobernacion y transparencia pa entre otro e proyectonan menciona.