Home Local DVG ta ricibi asistencia tecnico di PAHO Aruba ta sigui fortalece programanan...

DVG ta ricibi asistencia tecnico di PAHO Aruba ta sigui fortalece programanan di vacunacion

SHARE

ORANJESTAD, Aruba: Recientemente Directie Volksgezondheid (DVG)  a ricibi bishita di dr. Carlos Torres, Consehero di Inmunisacion di PAHO. Panamerican Health Association (PAHO) ta e partner di mas grandi den Caribe di DVG cual ta asisti e organisacion cu cualkier yudansa, sea ta tecnico of operacional ora esaki ta necesario. Dr. Torres a bishita DVG e ocasion aki specificamente pa mira, evalua y conseha Directie Volksgezondheid riba e programanan y maneho di vacunacion andando pa hopi aña caba. Haciendo esaki DVG por fortalece e servicio cu ta keda duna na pueblo y sigura cu tur cos ta cana optimal. Banda di esaki, e bishita di PAHO ta pa sigui garantisa cu Aruba ta cumpli cu tur norma y regla di vacunacion. Desde e programanan di vacunacion, momento cu e vacuna drenta Aruba, almacena e vacunanan aki te na ora di distribui e vacuna na un persona, e usuario mester por ta sigur di e control, calidad y siguridad cu esaki a ricibi.

 

Aruba conoce programanan di vacunacion amplio, pa cual durante añanan a logra di vacuna mas di 95% di mucha y hende grandi. Esaki mirando e diferente programa di vacunacion cu DVG ta conta cun’e cuminsando desde edad 0 te cu hende grandi. E bishita di dr. Torres tabata specificamente p’e trabounan cu DVG ta realisando na e momentonan aki. Durante su bishita, dr. Torres a enfoca riba e fortalecemento di e programa di inmunisacion. E bishita aki a trece cun’e oportunidadnan pa mehora e componente principal di e programa di inmunisacion cu tin di haber cu e maneho di vacuna, esta e cadena di friu. Cu e cadena di friu ta referi na e control di temperatura pa vacuna mirando cu  desde cu cada vacuna yega Aruba mester almacena esaki corectamente y na nivel nacional.

 

Directie Volksgezondheid a ricibi hopi feedback durante e bishita di dr. Torres y a haci hopi pregunta. El a duna algun tip hopi profesional y alcaso, ilustrando algun posibilidad nobo cu DVG por haci uzo di dje. Mundo ta cambia y ta digitalisando. Den caso di inmunisacion esaki ta mescos. Mester tene tur  e desaroyonan aki na cuenta pa asina por vigila y controla mas di cerca henter e programa di vacuna.

 

Dr. Torres a indica cu e pais ta conta cu un infrastructura cu capacidad suficiente pa almacena tur loke cu tin di haber cu inmunisacion pa henter 1 aña di vacuna pa e poblacion cu nos ta conta cun’e. Incluso e infrastructura cu DVG ta conta cun’e ta apto pa  proyeccion pa introduci vacunanan nobo na nivel nacional.

 

Tanto Directie Volksgezondheid y dr. Torres a keda sumamente satisfecho cu e bishita na e organisacion caminda cu a sigura cu den futuro e compromiso di PAHO ta continua pa apoya DVG. Banda di esaki e dr. a duna di conoce cu Aruba ta cumpli cu tur norma di vacunacion pa por brinda nos pais e calidad y siguridad di producto cu nan merece.