A enfoca riba henter e maneho di admision di stranheronan den nos mercado laboral
ORANJESTAD, Aruba – Recientemente AHATA a organisa un tayer hunto cu DIMAS, DAO y DPL pa su miembronan. Durante e tayer aki, e miembronan a ricibi diferente informacion importante di leynan di labor y di empleadonan stranheronan cu ta kier bin haci un carera na Aruba. Miembronan di AHATA a ricibi hopi informacion pa asina nan por uza durante nan trabou.
Michel Henriquez, kende ta Manager di e “Vreemdelingenketen” di Gobierno, a splica cu a inicia cu e tayer algun siman pasa. El a indica cu a organisa e tayer aki pa motibo cu nan a ripara cu ainda tin incertidumbre p’e maneho nobo cu tin den Gobierno y e departamentonan di HR di hotelnan. Michel Henriquez a elabora cu hunto cu Jim Hepple di AHATA a sinta cu e Directornan di e Departamentonan envolvi, esta DAO, DPL y DIMAS. Asina aki a bin cu e idea pa sinta cu tur departamento di recurso humano di hotelnan pa asina tur hende por ta na altura di tur cambio cu a bin na September ultimo.
Durante e tayer aki, tambe nan a papia riba e maneho di 2013 di ley laboral pasobra ainda tabatin cosnan no comprendibel riba esaki. Michel Henriquez a indica cu tambe nan a enfoca riba e parti di permisonan, pa motibo cu nan a cuminsa topa cu permiso falso y cosnan cu no ta corecto den e mercado. A duna tur e puntonan aki durante e tayer pa asina e miembronan di AHATA por mira esaki y tuma nota riba nan y unda por duna denuncia riba e situacionnan aki, pasobra na final e empleado ta sali perhudica ora cu cosnan asina sosode.
DIMAS a tene nan presentacion na e miembronan di AHATA y Kathy Paskel, directora di DIMAS, a splica cu nan a conta diferente aspecto, a elabora riba nan procedura pero tambe kico tur por spera di DIMAS den e proximo añanan. Durante e tayer aki, DIMAS a duna e miembronan di AHATA guia con nan por mira cu un permiso ta valido y no falsifica, asina e directora a expresa. Tur esunnan cu tabata presente na e tayer, tabata interesa den e procesonan con cosnan ta cana.
Beleidsmedewerker di Dimas, Jacqueline Harewood, a indica cu DIMAS ta un parti hopi importante pa loke ta trata permiso pa stranheronan. Pa cu esaki el a splica e miembronan di AHATA riba e procesonan pero tambe reconocemento di permiso falso cu no ta facil pa reconoce. Aworaki DIMAS ta den e proceso di digitalisacion y tambe nan ta den e fase di implementacion di un sistema nobo y tur esaki nan a splica esunnan cu tabata presente.
AHATA a pidi Directie Arbeidszaken (DAO) pa duna un presentacion riba Uitzend bureau y Gwendy Kock, hurista di e departamento a haci esaki. El a duna un splicacion riba e ley di esaki, pa motibo cu tin cierto mal interpretacion con e Uitzend bureau ta funcionando. A splica riba e ley pa esaki ta mas comprendibel di kico ta e condicionnan di Uitzend bureau, kico nan mag di uza y con nan por zet in e empleadonan. DAO a ricibi hopi pregunta riba e tema aki y ta spera cu awo esaki ta mas comprendibel.
PR y HR Staf functionaris di DPL, Richenel Stamper tabata presente na e tayer di AHATA y el a splica cu Departamento Progreso Laboral a duna un presentacion riba tur servicio cu ta duna. Tambe a papia riba e maneho ehecuta na e departamento. Richenel Stamper a indica cu e informacionnan aki no ta algo nobo p’e miembronan di AHATA, pero ta importante pa duna informacion despues di hopi tempo unda cu ta enfoca riba e cambionan y highlights di e maneho cu nan ta ehecuta. E meta di DPL ta pa fungi como e brug entre e miembronan di AHATA entre otro cu ta dunadonan di trabou y buscadonan di trabou.
AHATA ta sumamente gradici na Richenell Stamper di DPL, Jacqueline Harewood di DIMAS y Wendy Kock di DAO pa haci e tayer aki posibel, unda cu a ofrece 3 diferente presentacion interesante cu informacionnan valioso p’e miembronan di AHATA, asina Vanessa Rasmussen di AHATA a duna di conoce.