Durante un ceremonia chikito na HC adidas Aruba, situa den Renaissance Mall, e bala oficial cu lo wordo usa durante FIFA woldcup 2018 na Russia a wordo desvela. E bala a yega Aruba un dia anterior, y hunto cu AVB a mustra e bala pa prome biaha pa e public di Aruba. Durante e ceremonia, a papia Jonathan Wever, Marketing Manager di HC adidas Aruba, cu a splica un poco tocante e historia y tecnologia di e bala. Di parti di AVB, a papia señor Koopman, cu ta director tecnico di AVB, y e la splica un poco su rol den e federacion, y con e ta mira e situacion actual di Futbol na Aruba. E la papia hopi bunita di Futbol na Aruba, lagando sa bon cla cu e desaroyo ta sumamente positive y e futuro ta mustra di bai ta hopi interesante. Na palabra nos a hanja señor Richard Dijkhof tambe, cu ta presidente di AVB, cu a agradeci HC adidas Aruba pa e ceremonia y a toca riba e gran relacion entre AVB y HC adidas Aruba. Presente den public nos a hanja varios deportista y miembronan di directive di varios team di Futbol kinan na Aruba, cu a mustra hopi entusiasmo pa e diseño y “looks” di e bala nobo.
E bala cu a wordo desvela ta jama e Telstar 18. E bala aki ta hopi particular, como e ta e “reinvention” di e prome bala blanco cu patterns preto, cu a wordo desvela den anja 1970 door di adidas. E prome Telstar a revoluciona con Futbol a crece desde anja 1970, como e la yuda popularisa e deporte. Danki na e diseño ingenuo di adidas e tempo ei, e bala por a wordo mira hopi mihor riba veld durante wega, y mas aun pa esnan cu ta wak e wega riba television. Na HC adidas Aruba, lo tin disponibel algun bala special di Telstar 18, cu lo tin un “NFC chip”” den e bala, unda lo por conecta cu e bala via un app rib abo smartphone. Esaki lo duna informacion valioso pa cualkier futbolista, cu lo kier mira por ehempel e trayectora of speed di e bala despues di a skop e.
Den number di Monique Janssen, directora di HC adidas Aruba, nos lo kier agradeci e miembronan di prensa cu a presenta, y deportistanan cu a presencia y e public cu a yega asina join nos den e desvelacion di e bala Telstar 18.
E bala ta obtenibel na HC adidas Aruba desde diasabra awo. Nos ta invita pueblo pa pasa serka nos, pa asina mira e bala,y mesora take a look tambe den nos store.