Home » Evelyn Wever Croes: Minister Schwengle a aproba gastonan adicional di hospital contra conseho di departamento di Finansas

Evelyn Wever Croes: Minister Schwengle a aproba gastonan adicional di hospital contra conseho di departamento di Finansas

by Admin
0 comment 55 views

Ademas a haya placa pa sala di operacion dos biaha!

ORANJESTAD – Parlamento e siman aki a trata e proyecto di hospital y e gastonan adicional di 83 miyon cu tin mester pa e sala di operacion y e intensive care unit. “E reunion aki no ta bai cu si nos kier e salanan di operacion si of no. Claro cu nos tur kier esaki. E reunion aki ta pa exigi respet pa e Parlamento aki. Nos como e Parlamento nobo, contrario na e Parlamento anterior, kier manda un señal bon cla pa tur gobierno, actual y nobo, cu si Parlamento duna autorisacion pa un proyecto di 250 miyon florin, ningun minister por desvia riba su mes y hisa e gastonan cu mas di 80 miyon florin y pretende cu e no mester bai Parlamento. Ni si conseho legal ta bisa cu no mester, si bo ta un minister cu ta respeta democracia, bo gevoel moral mester bisabo cu no ta corecto pa hisa e gastonan cu 30%, sin bai Parlamento prome.

CONSEHO LEGAL POSITIVO

Segun e minister, e contract actual ta permiti cualquier aumento di huur sin mester bin Parlamento prome. Den e caso aki ta un aumento di mas di 30%; esaki ya no ta parse djis aumento di gasto, e ta 1/3 parti di e gastonan original. Si no tbt 30%, pero tbt 100%, tambe por a djis hisa e gastonan y hisa e huur? Si ta asina, nos mester bai revisa e contract, pasobra e por ta legal, pero e no ta moral, e ta kibra e fundeshi di e deber di control di Parlamento.

CONSEHO FINANCIERO NEGATIVO

Mas importante ta pa contesta e pregunta: con nos ta bai paga pa e huur adicional aki, pues kiko e implicacionnan financiero ta riba termino largo y corto. Con ta bai tene cuenta cu esaki? AZV por carg’e? Con gobierno a pensa di paga pa e gastonan aki? Lo mester hisa e prima di AZV of e BAZV pa esaki? Ningun di e preguntanan aki e minister por a contesta.

Locual ta hasi e caso mas serio ta cu e aumento di gasto debi na sala di operacion a pasa via di un presupuesto supletorio na fin di 2015. Dicon atrobe ta menciona gastonan adicional pa construi sala di operacion, tampoco e minister a logra convense Parlamento. Remarcable ta cu e ex presidente di parlamento sra Wyatt-Ras a lubida esaki tambe.

Locual mas nos ta desaproba ta cu e minister a sconde e conseho negativo financiero pa nos. Ta apenas despues cu mi a pidi tres biaha pa wak e conseho aki, e minister a duna nos e conseho negativo. E reunion aki a mustra e contraste: e parlamento anterior cu tabata sconde cos, y e parlamento nobo cu ta trese transparencia. Esaki ta e cambio cu pueblo a pidi.

Aruba no merese un cuido di salud mediocre, sigur no un hospital sin sala di operacion, sin ICU. Tampoco un deal asina dudoso cu un costo cu cada biaha ta sigi aumenta, y pa colmo sin cu mester bin Parlamento y duna cuenta prome.

Aruba merece un cuido di salud digno, un servicio medico optimal, y un hospital di calidad.

Aruba merese un gobierno transparente, cu no tin nada di sconde y cu ta duna cuenta debidamente na su pueblo y na su Parlamento.

Y esey e Parlamento nobo kier logra, nos compromiso ta pa realisa e sonjo di e cuidadanonan di nos pais, cu un bon cuido di salud, cu un bon atencion na hospital, cu suficiente espacio na hospital pa atende esnan cu mester di atencion. Awe nos a pidi e reunion aki tambe pasobra nos compromiso ta pa brinda transparencia. Pa asina cada cuidadano sa. Pueblo tambe a expresa esaki claramente dia 22 di september”, lider di MEP Evelyn Wever-Croes a duna di conose.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio