ORANJESTAD, Aruba: St. Fundacion Lotto pa Deporte a organisa un evento pa trece tur partner di deporte, den cual a repasa e puntonan treci padilanti durante e seminario di PWC riba construi un comunidad di deporte riba nos isla. E evento a bay masha ameno. Presidente di St. Fundacion Lotto pa Deporte a indica cu a logra hopi caba den deporte, pero cu e caminda pa progreso ainda ta largo.
Mr. Di-Stefano Wernet RA, Presidente di St. Fundacion Lotto pa Deporte a recorda tur hende riba e importancia pa traha hunto riba deporte. Tambe a gradici Minister Dr. Schwengle pa tur loke el a haci pa yuda mehora deporte. E Presidente di FLpD a sigui splica cu tabatin un lectura di con pa crea un comunidad deportivo. El a pidi pa tur instancia y federacion traha hunto y purba aplica e tipnan duna pa haci deporte miho na Aruba. Pa tin un comunidad deportivo ta algo bon, pasobra e ta bon p’e desaroyo humano, e formacion di hende. E anochi aki Mr. Di-Stefano Wernet RA a elabora riba diferente punto cu ta importante no solamente p’e desaroyo di deporte pero tambe pa tin un miho comunidad.
Minister Schwengle tabata contento di por a reuni un biaha mas cu partnernan di deporte cu ta, IBiSA, St. Fundacion Lotto pa Deporte, Aruba Sport Unie, COA, FFD, AVB y otronan mas. Hunto cu tur partner na un forma frecuente el a traha cu nan pa asina hiba deporte dilanti. E maneho hiba pa cu deporte no tabata di un “quick score”, cu ta haci proyectonan chikito pero no tin impacto grandi cual lo por mustra ta algo bunita. Minister Schwengle a splica cu el a enfoca mas riba e maneho di cual el a enfoca na trece unidad den un vision y esaki tabata falta. E maneho aki tabata pa cu den mundo deportivo tin un vision unda ta bay. A pone tur esaki den e documento “Sport Visie Document”, di cual tur partner a firma esaki. E documento aki ta mustra e vision cu nan kier p’e proximo añanan.
Tambe a pone enfoke riba bon gobernacion den organisacionnan deportivo y a firma un documento. Lo haci uzo di e codigo di bon gobernacion den e mundo deportivo y un otro enfoke tabata pa tin mas placa pa deporte. A logra esaki door di renegosha e contract cu Canadian Bank Note (CBN) cu ta organisa loteria na Aruba. Tur esunnan cu a coopera na logra e metanan aki, Minister Schwengle a gradici nan.
Awo no lo mira e frutonan aki, pero den e proximo añanan lo por mira esaki den deporte. Mundo Deportivo tabatin mester di un miho fundeshi y awo tin esaki. E mundo deportivo a mira e balor di tin e fundeshi aki y ta spera cu e siguiente gobernante por sigui traha riba e fundeshi. El a indica cu no lo ta facil p’e siguiente gobernante sigui cu e trabou, pasobra ainda tin hopi cos pa haci den deporte. Minister Schwengle a gradici tur persona cu el a traha cu nan den deporte y a bisa nan pa sigui cu e bon trabou.