Home » Despues di hopi preparacion pa mudamento Piso 2 den New Bed Tower di HOH a bira “Pediatrics”

Despues di hopi preparacion pa mudamento Piso 2 den New Bed Tower di HOH a bira “Pediatrics”

by Admin
0 comment 52 views

ORANJESTAD, Aruba: E mudamento di pashentnan na Hospital a continua y e biaha aki a toca Departamento di Mucha. Den e edificio ya existente e departamento di mucha tabata riba piso 5, pero den e New Bed Tower esaki lo ta piso 2. Aki a bin cambio no solamente p’e nursenan pero tambe pa pashentnan, unda cu den camber lo tin maximo 2 persona y esaki ta duna mas privacidad. Pashentnan a keda asombra di mira e cambionan y a haya e New Bed Tower bunita.

E cambio di mas grandi cu tin den e edificio nobo ta cu e ta mas grandi y espacio p’e mayor cu ta keda drumi, asina Veronica Vermeulen-Hughes, Zorgmanager Pediatrics, a duna di conoce. Antes esaki tabata sumamente chikito y no confortabel y awo tin un slaapbank y tambe un “lazy chair”cu ta mas comodo pa nan por keda drumi cu nan yiu cu ta interna. Tambe tin espacio den e camber, unda cu e mucha por cana rond. Durante e mudamento e adultonan a haya un flor riba nan nachtkastje, mientras cu e muchanan a ricibi un co’i hunga cu e dia di mudamento como recuerdo.

P’e parti di neonatal e departamento aki a bay hopi dilanti den loke ta espacio, privacidad y modernismo, asina el a duna di conoce.

Kinderarts, dr. Louise Rafael-Croes ta haya cu e mudamento di Pediatrics a bay hopi bon y tur cos a cana manera mester ta, unda cu a pasa tur pashent 1 pa 1 pa e edificio nobo. E nursenan, dokter y zorgmanager ta den un departamento completamente nobo y esaki ta grandi y espacioso. Awo tur pashent ta hopi mas visibel y e sistema ta uno hopi modernisa. Dr. Rafael-Croes tabata un tiki emociona unda cu e mester a bisa ayo na un departamento chikito, di cual pa 20 aña largo nan tabata traha cu algun limitacion y asina mes brindando un servicio di calidad halto. Pero cu e cambio aki awo nan ta traha den un luga mas amplio y mas modernisa. Awo cu e modernismo t’ey por mira cu lo avansa un tiki mas lihe y tur hende ta mas contento cu e cambio aki.

No solamente den e cuido di e pashent directamente, pero tambe rond di e pashent manera den caso di emergencia of un reanimacion, unda cu nan no lo cana dal den otro mas.

Kinderverpleegkundige, Miriam van Trigt-Bremo a duna di conoce cu tin hopi bentaha den e New Bed Tower, pero esun mas primordial pa nan ta e espacio y comodidad y visibilidad p’e mayornan. E mayornan por sa cua stacion por bay y cua enfermero ta atende cu nan yiu. Departamento awo conoci como Pediatrics ainda tin e mesun reparticion cu ta e “zalen kant”, “boxen kant” cu ta e parti di isolacion, couveuse y camber di baby.

Pa loke ta e particion ta cu e couveuse y camber di baby ta keda hunto y ta den mesun espacio, tin e zalen kant y e banda di isolacion. E privacidad cu tin awo den e kinder afdeling ta cu den cada camber di isolacion tin 1 pashent, mientras cu den e zalen kant tin 2 pashent pa camber. Den pasado tabatin 6 persona den un camber y camber di kleuter/peuter tabatin 4, di cual tin privacidad awo cu e cambionan aki.

Daniela Peterson mama di baby Dyxiella a duna di conoce cu e ta hopi contento cu e piso nobo cu ta mas sofistica y grandi. E nursenan ta net eynan cu e baby. E luga ta bunita y e stoelnan ta mas comodo. Den e otro edificio e piso tabata chikito y awo cu den e New Bed Tower e ta mas grandi. Den e otro banda e babynan ta nan so pero awo e nursenan ta cerca di e babynan y por tende nan mas lihe.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio