Afpakteam conhuntamente cu varios otro instancia, manera Cuerpo Policial di Aruba, Aduana y Kustwacht, a haci invalnan na diferente adres na Aruba ayeranochi y a detene seis persona.
Na varios lugar a haya un cantidad bastante grandi di fuel ilegal, cual a wordo tuma den beslag.
Tambe a tuma un speedboat go-fast y e tres vehiculonan cu tabata wordo usa den e contrabanda aki den beslag pa Afpakteam.
Contrabanda di fuel ta prohibi pa ley. Baha combustible na canto, sigur cu e meta pa bendele, ta un crimen. Desde corto e importacion di combustible –otro cu na cantidad grandi- a wordo prohibi. Esaki ta dirigi riba particularmente cantidadnan chikito treci abordo.
E lucha contra e importacion, deposito y benta di fuel tin prioridad halto di Ministerio Publico y Afpakteam. E razon mas importante pa esaki ta e gran peligro cu traficacion ta trece cu ne pa personanan y propiedadnan. Den e ultimo lunanan por ehempel, a resulta cu un boto go-fast carga cu gasolin a coy candela riba lama grandi y a kima completamente. For di investigacion a resulta cu e fuel ta wordo transporta, baha, warda y bendi den nos vecindarionan na un forma totalmente ireglamenta y insigur. Ta papia pa su mes cu si un di e lugarnan aki den un vecindario yena cu cas, pega candela, e consecuencianan lo ta hopi grave.
Un di dos motibo ta pa bringa competencia unfair. Fuel illegal ta wordo bendi na un prijs mucho mas abao, loke ta haci competencia hopi dificil.
Afpakteam ta un cooperacion entre Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto, FIOD (Fiscale Inlichtingen- en Opsporingsdienst), Marechaussee (KMar), Kustwacht Aruba, Meldpunt (Meldpunt Ongebruikelijke Transacties) y RST (Recherche Samenwerkingsteam) y ta traha riba combati criminalidad financiero economico. Afpakteam a start riba prome di maart. Si bo persona por tin informacion tocante señalnan di labamento di placa, anto por acerca afpakteam via e-mail na: [email protected] of via tiplijn: 11141.Crimen no por paga no!